- Úkimet pen ákimdik boı berer emes, osy bir kiltıpany kóp dúnıeni jalǵastyratyn bolyp sheshim qabyldady. Jobany aıaqtaýdan ózge jol joq dep maǵan baıandap jatyr, sebebi tym alysqa uzap ketken eken.
Men Sybaılas jemqorlyqqa qarsy is-qımyl agenttigine osy isti tergeýdi kúsheıtýdi tapsyrdym, shetelge asqan eks- basshynyń ǵana izine túspeı, ózgelerdi de tekserý kerek.
Sonyń ishinde, jobaǵa qatysty sheshim qabyldaǵan ákimdik basshylaryn tekserýdi tapsyramyn. Álbette olardyń qoly qoıylǵan shyǵar. Bul jerde másele jalǵyz LRT jobasynyń oryndaýshysynda emes, bul sheshimdi ákimdik qabyldaǵan. Tereńirek úńilý kerek, - dedi Toqaev astanany damytý máselelerine arnalǵan keńeste.
Memleket basshysy bul jobanyń óte kúmándi ekenin jáne ekonomıkalyq jaǵynan túsiniksiz bolyp otyrǵanyn atap ótti. Alaıda halyqaralyq mindettemeler alynyp qoıǵannan keıin, jobany aıaqtaý kerek.
- Máseleniń basyn ashaıyq. Bar qashyqtyǵy 22,5 shaqyrym, al onyń boıynda 18 stansıa josparlanǵan. Sonda bul LRT-ny ne úshin salyp jatyrmyz? Arasy 1 shaqyrymnan asar-aspas 18 stansıa bolsa. Biz ondaı qashyqtyqty jaıaý qydyryp-aq júre alamyz ǵoı. Mundaı jobanyń qalaısha qabyldanyp ketkenin men túsinbeımin, - dep atap ótti memleket basshysy.
Prezıdent Úkimet pen ákimdikke LRT-nyń alǵashqy kezeginiń qurylysyn jalǵastyrý men aıaqtaýdyń naqty merzimderin belgilep, ekinshi kezegin júzege asyrý kestesi men tetikterin ázirleýdi tapsyrdy.
