Senat Tóraǵasy otyrys barysynda Biýro múshelerine bilim berý, densaýlyq saqtaý júielerin tsifrlandyrý men aýyldardaǵy internet máselelerin sheshýdi tapsyrdy.
Dariǵa Nazarbaevanyń aitýynsha, qazir aimaqtarda internet joq jáne ol muǵalimder júktemesin ulǵaitady degen syltaýmen "Kúndelik" elektrondyq kúndeligi servisiniń jumysy shektele bastady.
"Árbir jekelegen jaǵdaidyń sheshimin izdestirý kerek. Ákimdikter men jergilikti bilim basqarmalaryna elektrondy kúndelik nege tiimsiz? Óitkeni ol barlyq bilim berý, testileý, sabaqqa qatysý, sabaq ótkizý júiesin ashyq kórsetedi.
"Kúndelik" barlyq sabaqtardyń bolatynyn álde qaǵazda ǵana qalatynyn anyqtap beredi. Búgingi kúni elektrondy kúndelik oqýshylardyń úlgerim deńgeiin, muǵalimderdiń ózderiniń daiyndyǵyn – osynyń bárin kórsetip otyr. Bul olarǵa tiimsiz", - dedi D.Nazarbaeva.
Senat Tóraǵasy sondai-aq aýyldyq nysandarǵa, onyń ishinde áleýmettik infraqurylym obektilerine joǵary jyldamdyqtaǵy internet júrgizý úshin ákimdikterge bólingen qarajatty igerýdi tekserý qajettigi týraly da aitty.
Dariǵa Nazarbaeva internet tarifterine de nazar aýdardy.
"Bizdiń meditsinalyq mekemeler men jalpy bilim berý mekemelerine internet tarifteri nege bir ese joǵary, al jyldamdyǵy nege bir ese tómen? "Qazaqtelekom" jyl saiyn osy maqsattarǵa memleketten sýbsidiia alǵannyń ózinde osyndai. Munyń da túiinin sheshý kerek", - dedi ol.
Senat Tóraǵasy otyrysty qorytyndylai kelip, depýtattardyń el aimaqtaryna aldaǵy saparyna toqtaldy."Meniń oiymsha, aimaq basshylary sirek baratyn eń shalǵai eldi mekenderde bolǵan jaqsy. Osy saparlar kezinde depýtattardyń negizgi maqsaty sailaýshylardyń amanattaryn jinaý jáne azamattardyń ózekti máselelerin sheshý bolýy tiis. Jańa jylda Senatta óńirler kúnderin ótkizýdi josparlap otyrmyz, ol aqparat bizge óte qajet bolady", - dedi joǵarǵy Palata basshysy.
