"Nazarbaev ziiatkerlik mektepteriniń" jumysynda kóptegen zań buzýshylyq anyqtaldy, dep habarlaidy Dalanews.kz.
Qazaqstannyń Joǵarǵy aýditorlyq palatasynyń málimetinshe, 3 jyl ishinde NZM 16,4 mlrd teńge kólemindegi qarajatty igermegen, al bank shottarynda jyl saiyn 27-den 55 mlrd teńgege deiingi mólsherde qarjy qaldyqtary jinaqtalǵan.
"Ulytaý oblysynyń biýdjeti kólemindegi qarajat osy bes jyldan az ýaqyt ishinde Nazarbaev Ziiatkerlik mektepterine bólingen. Onyń ishinde 22 mlrd teńgeden astam qarajat tájiribeni taratýǵa qaralǵan. Statistikany qalai qarasaq ta, ókinishke qarai, aitarlyqtai ózgeris joq. Onyń ústine, bul tipti memlekettik josparlaý júiesi sheńberinde de qamtylmaǵan", - dedi palata tóraǵasy Álihan Smaiylov.
NZM ótkizgen satyp alýlar boiynsha 10,5 milliard (22 million dollar) teńgege zań buzýshylyq anyqtaldy. Mysaly, 1 milliard teńgeden (2,09 million dollar) astam somaǵa bir kózden satyp alý tásilin zańsyz qoldaný, ótinimderdi negizsiz jiberý nemese qabyldamaý jáne taǵy basqa jaǵdailar oryn alǵan.
Jalpy memlekettik aýdit mynalardy anyqtady:
274,4 mln teńgege (575,2 myń dollar) qarjylyq zań buzýshylyq;
8,3 mlrd teńgege (17,4 mln dollar) tiimsiz josparlaý;
tiimsiz paidalaný – shamamen 6 mlrd teńge (12,5 mln dollar).
Sondai-aq 134 protsestik zań buzýshylyq jáne 30 júielik kemshilik anyqtaldy.
Tekserý is-sharalarynyń qorytyndysy boiynsha quqyq qorǵaý organdaryna bir material, ákimshilik quqyq buzýshylyq belgileri bar taǵy on fakti boiynsha ákimshilik is qozǵaý úshin ýákiletti organdarǵa joldandy.
