Kezdesý barysynda taraptar eki eldiń saýda-ekonomıka jáne ınvestısıa salalaryndaǵy qarym-qatynastarynyń qazirgi jaǵdaıy men damý perspektıvalaryn talqylady.
Memleket basshysy Saýda mınıstriniń bul sapary AQSH-tyń Ortalyq Azıa óńirimen yntymaqtastyqty damytýǵa múddeli ekenin aıqyn ańǵartatynyn, sondaı-aq ózara ekonomıkalyq baılanystardy nyǵaıtýǵa septigin tıgizetinin aıtty.
Nursultan Nazarbaev bıylǵy qańtar aıyndaǵy AQSH-qa resmı sapary barysynda joǵary deńgeıde ótken kezdesýlerdiń nátıjelerine toqtaldy.
«Kezdesýde Prezıdent Donald Tramppen ózara túsinistikke qol jetkizdik. Qazaqstan men Amerıka arasyndaǵy qarym-qatynastar keńeıtilgen seriktestik deńgeıine kóterildi. Bul týraly tıisti málimdemege qol qoıyldy.
Men resmı sapar barysynda AQSH-tyń «bıznes kapıtandarynyń» úlken tobymen kezdestim. Birlesken bıznes-forýmda jalpy quny 7 mıllıard AQSH dollary bolatyn túrli 27 komersıalyq qujatqa qol qoıyldy.
Búginde elderimiz arasyndaǵy saýda kólemi 2 mıllıard AQSH dollaryna jetti. Bıyl bul kórsetkish 30 paıyzǵa ósti», – dedi Qazaqstan Prezıdenti.
Sonymen qatar, Memleket basshysy eki el arasyndaǵy yntymaqtastyqtyń damý tarıhyna toqtalyp, Qazaqstan táýelsizdiginiń alǵashqy jyldarynda qol qoıylǵan kelisimder jóninde aıtty.
«Qazaqstan ıadrolyq qarýdan bas tartyp, álemdegi iri ıadrolyq polıgondy japqan soń, biz Prezıdent úlken Djordj Býshpen yntymaqtastyq jóninde birinshi kelisimshartqa qol qoıdyq.
Sol kezde «Shevron» kompanıasy bizdiń elde jumys isteýge nıet bildirdi. Bul kompanıa jumysynyń tarıhy Qazaqstanda bıznes júrgizýdiń qanshalyqty tabysty bolatynyn aıqyn kórsetedi
, – dedi Qazaqstan Prezıdenti.
Memleket basshysy búginde Qazaqstannyń kópvektorly saıasat júrgizip otyrǵanyn jáne seriktes elderdiń bárimen tatý qarym-qatynas ornatqanyn atap ótti.
Ýılbýr Ross Nursultan Nazarbaevqa kezdesýge múmkindik týǵyzǵany úshin rızashylyq bildirip, Astanany kórgen kezdegi áseri jóninde áńgimeledi.
«Men Qazaqstanǵa birinshi ret kelip otyrmyn. Áýejaıdan kele jatyp, Astananyń sáýletine tamsana qaradym. Sizderde qurylys jumystary qarqyndy júrgizilýde ári ekonomıkalaryńyz da qaryshtap damyp keledi», – dedi AQSH-tyń Saýda mınıstri.
Sondaı-aq, Ý.Ross Astanaǵa ózimen birge Qazaqstanmen saýda-ekonomıkalyq qatynastardy damytýǵa nıet bildirgen 16 amerıkalyq kompanıanyń delegasıasy kelgenin atap ótti.
AQSH-tyń Saýda mınıstri Qazaqstan Prezıdentine AQSH Prezıdenti D.Tramptyń izgi tilegin jetkizip, eki memleket arasyndaǵy yntymaqtastyqty odan ári nyǵaıtyp, keńeıte túsýge múddeli ekenin aıtty.
