Qazaqstan prezidenti Nursultan Nazarbaev Astanada din salasyndaǵy zańdardy ózgertý qajetin málimdedi. Aqordanyń baspasóz qyzmetiniń habarlaýynsha, bul týraly ol din jáne azamattyq qoǵam isteri jónindegi ministr Nurlan Ermekbaevpen kezdesýinde aitqan. Kezdesýde prezident Ermekbaevtyń eldegi dini birlestikter jumysy týraly baiandamasyn tyńdaǵan.
"Elimizde barlyq dini birlestikterdiń jumys isteýine barlyq jaǵdai jasalyp, din ustaný erkindigine kepildik berilgen. Biz bul saladaǵy tynyshtyqty saqtaýymyz kerek. Sonymen qatar dini ekstremizm, máselelerin tártipke salyp, zańnamany qaita qaraý kerek. Ministrliktiń aldynda qyrýar sharýa tur" degen Nazarbaev. Prezident dini qaýymdastyqtarmen, úkimettik emes sektormen jáne jastar uiymdarymen jumystardy budan ary jónge salý qajetin de aitqan.
Qazaqstanda 2011 jyly qabyldanǵan "Dini qyzmet jáne dini birlestikter týraly" zań boiynsha tirkelmegen dini uiymdardyń qyzmetine tyiym salynǵan. Ermekbaevtyń málimetinshe, qazir elde 3600-den astam dini birlestik jumys isteidi jáne olardyń kópshiligi islam dini birlestikteri.
Quqyq qorǵaýshylar Qazaqstanda oi-pikir erkindigin, sóz bostandyǵyn, din men assotsiatsiia quqyǵyn shekteýdi jáne sot júiesi táýelsizdiginiń azdyǵyn adam quqyǵy salasyndaǵy eń kúrdeli máseleler dep sanaidy.
