Nursultan Nazarbaev kórmeniń Qazaqstan ekonomıkasyn damytýǵa mýltıplıkatıvtik turǵydan oń áser etkenin erekshe atap ótti.
– Shaǵyn jáne orta bıznestegi 1400-den astam kásiporyn quny 640 mıllıard teńge bolatyn taýarlardy jetkizýge jáne qyzmet kórsetýge tapsyrys aldy. Týrısik sektor jandana tústi. Týroperatorlardyń qyzmetine degen suranys 1,8 ese artty. Astanada kásipkerlik sýbektileriniń sany 10 paıyzdan asa kóbeıdi. Elorda búdjetine qyzmet kórsetý salasynan túsken salyq 1,2 ese ósti. Qazaqstannyń astanasy búkil álemniń nazaryn ózine aýdardy, – dedi Elbasy.
Memleket basshysy kórme aıasynda ótken mádenı jáne halyqaralyq sharalarǵa toqtaldy.
– Kún saıyn elordamyz tórtkúl dúnıeniń túkpir-túkpirinen jetken túrli mádenıettiń áýeni men naqyshyna bólenip turdy. Búgingi saltanatty rásim Islam yntymaqtastyǵy uıymynyń ǵylym jáne tehnologıalar jónindegi samıtimen tuspa-tus kelip otyr. Onda ıslam álemindegi ǵylymı-tehnıkalyq damýdyń mańyzdy máseleleri talqylanýda. Jalpy EKSPO aıasynda 6 myńnan astam túrli is-shara ótkizildi, – dedi Nursultan Nazarbaev.
Qazaqstan Prezıdenti elimizdiń Eýrazıa óńirindegi qaýipsiz ári qarqyndy damyp kele jatqan memleket retindegi oń ımıjin nyǵaıta túskenin atap ótti.
Memleket basshysy «Bolashaqtyń energıasy» aıasynda ozyq ıdeıalar men tehnologıalardyń damýyna túrtki bolǵan jáne álemde ǵylymnyń ózara yqpaldastyǵyn nyǵaıtýǵa septigin tıgizgen kórmeniń birqatar jaǵymdy aspektilerine toqtaldy.
– EKSPO búkil álemniń ıntellektýaldyq jáne tehnologıalyq áleýetin kórsetýge zor múmkindik berdi. Munda jańartylatyn energıa kózderi salasyndaǵy 140-qa jýyq ǵylymı jańalyq kópshilik nazaryna usynyldy, – dedi Nursultan Nazarbaev.
Sonymen qatar, Qazaqstan Prezıdenti EKSPO aıasynda qazirgi zamanǵy energetıkalyq saıasattyń basymdyqtary jóninde jahandyq dıalog uıymdastyrylǵanyn jáne energetıka men ekologıa salasyndaǵy zamanaýı problemalardy sheshýge arnalǵan usynymdar ázirlengenin atap ótti.
– EKSPO kórmesin ótkizý arqyly bizdiń el «jasyl» tehnologıalardy damytý ıdeıasyna berik ekenin taǵy da dáleldeı tústi. Jalpy bizdiń kórme «taza energetıkany» jahandyq deńgeıde damytýǵa aıryqsha úles qosatynyna senimdimin, – dedi Memleket basshysy.
Sonymen birge, Nursultan Nazarbaev EKSPO ınfraqurylymyn kórmeden keıin paıdalaný jospary jóninde oı bólisti.
– «Nur Álem» jáne kórme taqyryby kórinis tapqan basqa da birqatar pavılondar «EKSPO murasy» retinde saqtalady. Kórmeniń aıaqtalýy birneshe aýqymdy jańa jobalardy bastaýǵa múmkindik beredi. Eń aldymen, munda «Astana» halyqaralyq qarjy ortalyǵy ornalasady. Ol qarjy habyna, ınvestısıa tartatyn ortalyqqa aınalyp, halyqaralyq qarjy júıesinde laıyqty orynǵa ıe bolýǵa tıis, – dedi Qazaqstan Prezıdenti.
Sondaı-aq, Memleket basshysy «jasyl» tehnologıalar men ınvestısıalardy damytý jónindegi halyqaralyq ortalyqty jáne İT-startaptar halyqaralyq tehnoparkin qurýǵa arnalǵan jobalarǵa toqtaldy.
– «EKSPO» kórme kesheni tolyǵymen ınovasıalyq jáne ornyqty damýdyń maqsattaryna odan ári qyzmet etetin bolady. Barshańyzdy jańa ortalyqtardyń jumysyna belsendi atsalysýǵa shaqyramyn, – dedi Nursultan Nazarbaev.
Sońynda Qazaqstan Prezıdenti kórmeni ótkizýge úles qosqandardyń bárine alǵys aıtyp, kelgen qonaqtarǵa erekshe rızashylyǵyn bildirdi.
– Osymen halyqaralyq «EKSPO-2017» mamandandyrylǵan kórmesin jabyq dep jarıalaımyn! Onyń ıdeıasynyń tolyǵymen júzege asýyna qoldaý kórsetken Qazaqstan halqyna rızashylyǵymdy bildiremin. Kórmeniń sátti ótýine myńdaǵan adam atsalysyp, eńbek etti. Barshańyzǵa Qazaq jerindegi aıtýly sharaǵa belsene qatysqandaryńyz úshin alǵys aıtamyn, – dedi Memleket basshysy.
