Mirzieev: «Islam Karimov ekeýińiz qalyptastyrǵan yntymaqtastyq nyǵaia túsedi»
– Biz kelissózderdi keshe bastap ketken bolatynbyz. Kólik pen saýda úshin ózara shekaralardy ashý baǵytynda atqarylǵan jumystardy talqyladyq. Bul bizdiń elderimizdiń arasyndaǵy saýdanyń kúrt ósýine túrtki boldy. Ónimniń jańa túrleri jetkizile bastady. Búgin úlken biznes-forým ótedi. Oǵan eki elden 500 biznesmen qatysady. Quny 1 mlrd dollardy quraityn 75 kelisimshartqa qol qoiylady. Bul 25 jyl ishinde alǵash ret oryn alyp otyrǵan tarixi jaǵdai, – dedi N.Nazarbaev.
Qazaqstan Prezidenti eki el arasyndaǵy dostyq qarym qatynas Ózbekstannyń tuńǵysh memleket basshysy Islam Karimovtiń kezinde qalanǵanyn aityp ótti.
– Islam Karimov – meniń eń jaqyn dostarymnyń biri boldy. Jatqan jeri jaily bolsyn. Biz endi ary qarai da baýyrlas el retinde ári tatý-tátti kórshi retinde bir-birimizge kómektesip turamyz. Eki halyqtyń yntymaǵyn odan ary nyǵaityp, sol dástúrdi jalǵastyratyn bolamyz, – dedi Memleket basshysy.
Elbasynyń aitýynsha, Shavkat Mirzieev Ózbekstan Prezidenti bolǵan bes aidyń ishinde eki eldiń arasyndaǵy saýda-sattyq 30 paiyzǵa ósken.
Bul – Shavkat Mirzieevtiń Ózbekstan Respýblikasynyń Prezidenti retindegi shet memleketterge jasaǵan ekinshi resmi sapary. Buǵan deiin ol Túrkimenstanǵa barǵan edi.
Ózbekstan basshysy óz kezeginde Nursultan Ábishulyn óz eline qonaq bolýǵa shaqyrdy.
– Qazaqstan men Ózbekstan arasyndaǵy Islam Karimov ekeýińiz qalyptastyrǵan yntymaqtastyq odan ári nyǵaia túsedi. Biz Qazaqstandy eń jaqyn ári senimdi seriktesimiz dep sanaimyz. Qazaqstandy BUU qaýipsizdik keńesiniń turaqty emes múshesi bolýymen quttyqtaimyn. Búgingi kezdesý bizdiń bolashaq qatynasymyz úshin úlken mańyzǵa ie. Shaqyrǵanyńyz úshin alǵys bildiremin. Sizdi Ózbekstanǵa shaqyramyn, – dedi Shavkat Mirzieev.
Aita keteiik, Ózbekstan basshysy Qazaqstanǵa keshe kelgen bolatyn. Mártebeli meimandy QR Premer-ministri Baqytjan Saǵyntaev, vitse-premer A. Mamin, syrtqy ister ministri Q. Ábdirahmanov, Astana qalasynyń ákimi Á. Isekeshev, Qazaqstannyń ÓR-daǵy elshisi E. Ótembaev qarsy aldy.
Bek TÓLEÝOV
Foto: Baýyrjan JÝASBAEV
