«Qaita oqytý» degen ortalyqtarda etnikalyq qazaqtar boldy. Biraq byltyr bizdiń memleket basshymyz Qytaiǵa barǵan kezde, ol eldiń úkimeti etnikalyq qazaqtar bul ortalyqtardan shyǵarylǵanyn resmi túrde habarlady», – dedi ministr.
Onyń aitýynsha, qazir Qazaqstan Qytai biligimen etnikalyq qazaqtardyń máselesi boiynsha eki jaqty deńgeide jumys júrip jatyr.
Sońǵy eki jyldyń ishinde syrtqy ister ministrligine Qazaqstan azamattarynan Shyńjańda turatyn etnikalyq qazaqtarǵa qatysty 5 myń ótinish túsken. Olardyń barlyǵy qaralyp, tiisti kómek kórsetildi, dep sendirdi ministr.
– Byltyr etnikalyq qazaqtarǵa 43 myń viza berildi. Ol bir márteli emes, úsh jylǵa tegin beriletin vizalar. 2018 jyly biz tek 8 myń ǵana bergen edik. Ósim qandai ekenin kórip tursyz ba? Etnikalyq qazaqtar Qazaqstanǵa kóptep kelip jatyr, – dedi Tileýberdi.
Qytaida etnikalyq qazaqtardyń qysymǵa ushyraǵany jónindegi áńgimeniń taralǵanyna eki-úsh jyldyń ainalasy boldy.
Derekkózderge súiensek, Shyńjań lagerlerinde bir millionǵa jýyq etnikalyq qazaq pen uiǵyr otyr. Alǵashynda bul «saiasi úirený» lagerleri dep atalǵan edi, keiin Qytai biligi muny joqqa shyǵaryp, jai ǵana «kásibi oqytý ortalyqtary» ekenin aitty.
Jýyrda Qazaqstanǵa sapary barysynda AQSh-tyń memlekettik hatshysy Maik Pompeo álem elderin Qytaida etnikalyq qazaqtar men uiǵyrlardyń qýǵyndalýyn toqtatýǵa shaqyrdy.
Osydan keiin Qytaidyń Qazaqstandaǵy elshisi Chjan Siao AQSh memlekettik hatshysynyń aitqan sózine qatysty málimdeme jasady. Ol AQSh memlekettik hatshysynyń málimdemesin «Pompeonyń Qytaiǵa qarsy taǵy biri qoiylymy» dep atady.
