Densaýlyq saqtaý ministri Aqmaral Álnazarova áskerde júrip, bas-mi jaraqatyn alǵan Erbaian Muhtarǵa bailanysty pikir bildirip, onyń elge qashan oralatynyn jetkizdi, dep habarlaidy Dalanews.kz.
Ministr sarbazdyń jai-kúiin quqyq qorǵaýshy Inga Imanbai arqyly bilip otyrǵanyn alǵa tartty.
“Osydan úsh-tórt kún buryn habar almastyq. Erbaian emin alyp jatyr. Jyldyń aiaǵynda Qazaqstanǵa qaitýy qajet bolǵan. Biraq sodan keiin dárigerler qosymsha em taǵaiyndapty. Endi elge qaitý máselesin ózderi qabyldaityn bolady. Negizi 27 jeltoqsandai qaitamyz degen. Shetelde emdelip, aýyr hálde jatqan Qazaqstan Respýblikasynyń azamattarynyń barlyǵyn tasymaldaý, búgingi tańda memleket tarapynan iske asyrylyp jatyr. Osyǵan bailanysty Qazaqstanǵa qaitý kezinde sanitarlyq aviatsiia arqyly jetkizý uiymdastyrylatyn bolady”, — dedi ministr.
Eske salaiyq, byltyr jeltoqsan aiynda Ulttyq ulan jaýyngeri Erbaian Muhtar komaǵa tústi.
QR IIM Ulttyq ulanynyń baspasóz qyzmeti sarbazdyń densaýlyǵyna qatysty resmi málimdeme jasaǵan bolatyn.
Ulttyq ulannyń habarlaýynsha, qatardaǵy Erbaian Muhtardyń bas jaraqatyn alý faktisi boiynsha QR QK 440-baby 4-tarmaǵynyń 3-bóligine sai qylmystyq is qozǵalǵan. Bul jerde áskeri qyzmetshiler arasyndaǵy ózara qarym-qatynastardyń jarǵylyq erejelerin buza otyryp, densaýlyqqa aýyr ziian keltirgeni másele bolyp otyr.
Atalǵan oqiǵadan soń Erbaian Muhtarǵa Ystanbulǵa jol tartty. Munda oǵan sátti ota jasaldy.
Bul jańalyqty belgili zańger Inga Imanbai Facebook paraqshasynda jazǵan bolatyn.
“Jelide Erbaiannyń jaǵdaiyn surap, habarlasyp jatqan aǵaiynǵa myń alǵys. Qazir Erbaiannyń jaǵdaiy birqalypty, Stambulda emin jalǵastyryp jatyr. Birinshi turǵan foto búgin jasaldy. Ekinshi foto Stambulǵa kelgen kezde basyna jasalǵan otadan keiingi kezi. Qudaiǵa shúkir ota sátti jasalyp, endi reabilitatsiialyq em-shara, emdik dene shynyqtyrý protsedýralary bastaldy”, - dedi ol.
Aitýynsha, qalpyna kelý biraz ýaqytty talap etedi.
“Oǵan daiynbyz. Ary qarai Erbaiannyń jigeri men dárigerlerdiń kásibiligine senemiz. Erbaianymyzdy izdep, surap, niettes bolǵandaryńyzǵa myń alǵys. Qazirge jańalyǵymyz osy. Aitarlyqtai ózgeris, jaqsy jańalyǵymyz bolsa mindetti túrde Sizdermen bólisemiz”, - dep jazdy Inga Imanbai.
