QR İshki ister mınıstrligi mıllıondar men mıllıard qarjyny ıelengen halyqaralyq jáne memleketaralyq izdeýde bolǵan birneshe kúdiktini ustady. Olardyń arasynda qashyp júrgen lombard dırektory da bar, dep jazady Dalanews.kz.
Quzyrly vedomstvo málimetinshe, Almatyda krımınaldyq polısıa qyzmetkerleri asa iri mólsherde alaıaqtyq jasaǵany úshin halyqaralyq izdeýde júrgen er adamdy ustady. 2023 jyldyń qarasha aıynda kásipkerlik qyzmettiń atyn jamylǵan qaskúnem jábirlenýshige tenderge qatyssa, jaqsy paıda tabatynyn ýáde etip, 76 mln teńgeden astam qarajat pen Lexus 570 avtokóligin ıemdenip alǵan.
Mańǵystaý oblysynyń "Beıneý" temirjol stansıasynda kórshi memlekettiń azamaty ustaldy. Ol urlyq jasaǵany úshin polısıamen izdeýde júrgen. Ótken jyly er adam Atyraýda toppen birge bazar qoımasynan 19 mln teńgege taýar urlap ketken.
Qaraǵandyda memleketaralyq izdeýde júrgen adam ustaldy. Ol basqa bireýdiń múlkin ıemdenip, talan-tarajǵa saldy dep kúdikke ilingen. Qaskóı Shymkenttegi lombardtardyń biriniń fılıalynyń dırektory bola tura, óz sybaılastarymen birge JSHS-ǵa tıesili 1 mlrd teńge qarajatty ıemdenip, talan-tarajǵa salǵan.
Barlyq kúdikti ýaqytsha ustaý ızolátoryna qamaldy.
