«Nur Otan» neden utyldy?
Bizdiń biliktiń, depýtattar, ministrler men ákimder áleýmettik jelide jeke paraqshasyn ashyp, jurtshylyqpen bailanys ornatýdan qorqatyny, qashatyny jasyryn emes.
Áshimbaevtyń ózi:
"Ýaqyt ótken saiyn internet pen áleýmettik jeli ómirimizdiń ajyramas bóligine ainalyp keledi (shyndyǵynda ainalyp ketti degenińiz durys edi /red).
Tehnologiialar da bir orynda turmaidy. Qoǵam da ózgerýde. Sondyqtan biz de zamanǵa sai ózgerip, jetile túsýge tiispiz", – dep óziniń asa mańyzdy iske bel býyp, bilek sybana kiriskenine az-kem túsinikteme beripti.
Keibireýlerdiń Máýlen Áshimbaevtiń feisbýkke tirkelgenin habarlaǵanda ózgeler sekildi qýana almadyq.
Esesine "Áshimbaev áleýmettik jelige endi tirkelip jatyr ma?" dep tańǵalǵanymyzdy jasyryp qaiteiik.
Óitpegende she, eger Qýanysh Sultanov aǵamyz «feisbýkke» tirkelipti dese "ee-e-e" dep qoia salýǵa bolar edi.
Al Máýlen Áshimbaevtiń «áleýmettik jelige tirkelipti» degenin estigende esimizge belgili jazýshy Dýlat Isabekovtyń jasy jiyrmaǵa kelgen jigitti súndettegeni jaiyndaǵy ázil áńgimesi esimizge túsip, ezýimizge kúlki úiirilgenin jasyryp qaiteiik.
Bul da jarnama ma?
Ras aitamyz. Qaljyńdap otyrǵan joqpyz.
Muny demokratiiasy damyǵan ózge elderdegi áriptesteri estise kúletini anyq. Eýropany aitpaǵan kúnniń ózinde irgedegi Qyrǵyzstannyń Joǵary keneshiniń depýtattary "qazaqtyń saiasatkerleri áleýmettik jelige endi tirkelip jatyr eken" dep mazaq qylmai ma?
Nesin aitasyz, Áshimbaevtyń bul áreketi beinelep, ásirelep aitsaq, millionǵa tarta múshesi bar "Nur Otan" partiiasy úshin súiekke tańba boldy.
Jyl basynan beri áigili Discovery arnasy kórsete bastaǵan "Zolotaia lihoradka býrnoi vody" degen realiti shoý baǵdarlama bar. Sol shoýdy úzbei kóremiz.
Realiti shoýdyń 4-shi seriiasynda jasy jetpisten asqan Fred Hiort tórtinshi ret shańyraq kóterip, nekege turǵanyn kórsetedi.
Sol kezde Discovery arnasynyń áýesqoi jýrnalisteri Fred shaldan: "Qalyńdyǵyzben qalai tanystyńyz?" degende, jetpisti alqymdaǵan kúieý jigit: "Ǵashyǵymmen feisbýkta tanystym, keiinnen kezdesip, bir-birimizdi unattyq" dep aǵynan jarylyp, mahabbat hikaiasyn qysqasha áńgimelep beretini bar.
Áne, damyǵan eldiń shaldary feisbýkty paidalanyp, ǵashyǵyn taýyp jatyr.
[caption id="attachment_34660" align="aligncenter" width="1024"]
73 jasqa shyqqanda Feisbýk arqyly súiegenin taýyp, tórtinshi ret shańyraq kótergen Fred shalyńyz osy[/caption]
Biz she?
Al dúniejúzindegi damyǵan 30 eldiń qatarynan kirýge umtylǵan dúrdei eldiń bilik partiiasyn tizgindep otyrǵan Áshimbaev feisbýkke endi tirkelip jatyr.
Al osydan-aq oiyńyzdy qorytyndylai berińiz.
Nazarbaevtyń tsifrly ekonomika qurýǵa bet buryp, úlken jumysty bastap ketkenine birneshe jyldyń júzi bolady.
Al bizdiń biliktegiler bolsa, áleýmettik jelige endi tirkelgenin áńgime qylýdan árige asa almaýda. Mundai ógiz aiańmen bizder bul ǵasyrda tsifrly ekonomikany quryp bolmaimyz, qudai biledi...
Sońǵy ýaqyttary bir baiqaǵanymyz feisbýkty saiasatkerlerge qaraǵanda ánshi-ártister kóbirek paidalanatynyn baiqap júrmiz.
Ótkende ánshi Maqpal Isabekova óziniń instagramdaǵy akkaýntyn 1.5 mln. teńgege satyp, aqshasyn naýqas qyzǵa aýdarǵany esimizde.
Al osydan keiin halyq kim jaqyn, jurt arasynda kimniń tanymal ekenin baǵamdai berińiz.
Áleýmettik jelini baqylap otyratyn adam ádette – eldiń jaǵdaiy, halyqtyń oi-pikirimen jaqsy tanys. Al bizdiń shendiler bolsa, "zaman ózgerdi, eptep bizde ózgerýimiz kerek" dep tasbaqasha tyrbańdaýmen kúnin ótkizip jatyr.
Nege? Nege solai?
Odan utylmaidy bilik.
Anyǵy, bilik áleýmettik jelimen, áleýmettik jelide kóterilgen máselemen sanasatyn, san túrli saýalǵa jaýap beretin shaqqa jetti.
Áleýmettik jeli saiasattyń tilimen aitqanda mikrobilikke ainaldy.
Muny bir túsinse, Áshimbaev túsinýi tiis edi. Búgin emes, áýelden. «Nur Otanǵa» taǵaiyndalmai tura...
Áshimbaev ánsheiin atqaminer emes, biz bilsek. Kezinde Prezident janyndaǵy Qazaqstan strategiialyq institýtyn basqarǵan. Sarapshy. Saiasatker.
Sodan da shyǵar Áshimbaevtyń áleýmettik jelige endi tirkelýin óz basymyz jańalyq retinde qabyldai almadyq.
Áshimbaev siiaqty kesh oianǵandar qanshama, biraq. Oianbaǵandar qanshama...
Nurlan JUMAHAN, Arnaiy «Qala men Dala» gazeti úshin
