"Qazaqstanda qos azamattyqqa qatań tyiym salynǵan. Mundai talap Ata zańǵa engizilgen. Soǵan qaramai sońǵy ýaqytta qos azamattyqqa jol berilgen jaǵdaiǵa kýá bolýdamyz, bul tipti memqyzmetkerler arasynan anyqtalýda.
Atalǵan dúniege óte sergek qaraý qajet, sebebi bul ulttyq qaýipsizdik máselesin qamtidy. Mundai jait anyqtalǵan jaǵdaida onyń jolyn birden kesý kerek, – dedi Toqaev Ulttyq keńestiń otyrysynda.
Prezident osy rette byltyrǵy Joldaýynda aitylǵan "qos azamattyǵy bary anyqtalǵan memqyzmetkerler men kvazimemlekettik sektor basshylaryn jumystan qýý týraly" tapsyrma bergenin eske saldy. Ári Úkimet pen Memlekettik qyzmet ister agenttiginen osy baǵytta atqarylǵan jumys jaiynda esep berýdi talap etti.
Toqaevtyń atap ótkenindei "mundaidyń aldyn-alý úshin qoldanystaǵy zańnamasy qatańdatyp, jaýapkershilikti kúsheitý kerek".
Qazaqstan zańyna sai elimizde qos azamattyqqa tyiym salynǵan. «QR azamattyǵy týraly» zańy, 3-babyna sáikes, Qazaqstan Respýblikasy azamatynyń basqa memlekettiń azamattyǵynda bolýy tanylmaidy. 21-babyna sáikes, «eger adam basqa memlekettiń azamattyǵyn alǵan bolsa», QR azamattyǵyn joǵaltady.
Memleket basshysy 2020 jylǵy Qazaqstan halqyna joldaýynda sybailas jemqorlyq qylmysyn jasaǵandar úshin Qylmystyq kodekstegi jazany qataitý týraly ózgeris engizýdi tapsyryp, memlekettik qyzmetshiler men kvazimemlekettik sektorda basshylyq qyzmet atqaratyndar arasynda qos azamattyǵy bar laýazym ieleri anyqtalsa, olardyń qyzmetinen bosatylatynyn aitqan.
Ishki ister ministriniń orynbasary Aleksei Kalaichididiń aitýynsha qos azamattyqpen ustalǵandardyń arasynda memlekettik qyzmetshiler de kóp. Ótken jylǵy on bir aidyń ishinde qos azamattyqqa qatysty 431 fakt tirkelgen.
Aita ketsek buǵan deiin Shymkent qalasy politsiia departamentindegiler qalalyq Dene shynyqtyrý jáne sport basqarmasynyń basshysy Oleg Pochivalovtyń qos azamattyǵy baryn rastap, ony Qazaqstan azamattyǵynan aiyrý jaityn tirkegen.
Shymkent politsiiasynyń habarlaýynsha, basqarma basshysy Oleg Pochivalovtyń qyzmetinde zańbuzýshylyq bolǵan. Bul úshin sheneýnik qazaqstandyq azamattyǵynan aiyryldy.
«Shymkent qalasy Politsiia departamentiniń kóshi-qon qyzmeti basqarmasy 1974 jyly týǵan Qazaqstan Respýblikasynyń azamaty Oleg Vladimirovich Pochivalovtyń qos azamattyqta bolý faktisin anyqtady. Azamattyq týraly zańnyń 21-babyna sáikes, Kóshi-qon qyzmeti basqarmasy Qazaqstan Respýblikasynyń azamattyǵynan aiyrý jaityn tirkedi», - dep habarlady Shymkent qalasy PD azamattyq jáne migratsiia bóliminiń basshysy Gúljan Nysanbaeva.
