Qazaqstan musylmandary dinı basqarmasynyń tóraǵasy, Bas múftı Naýryzbaı qajy Taǵanuly bıyl pitir sadaqasynyń kólemi 535 teńgeni quraıtynyn aıtty, – dep habarlaıdy Dalanews.kz.  

– Bıylǵy pitir sadaqasy jan basyna 535 teńge bolyp bekitildi. Pitir sadaqasy mólsheri elimiz boıynsha eki keli unnyń ortaq baǵasy negizinde belgilendi. Pitir sadaqasyn qurma, meıiz baǵasymen berýge bolady, – dedi Bas múftı.

Onyń atap ótýinshe, sharıǵatymyz boıynsha balıǵatqa tolǵan, aqyl-esi durys árbir musylmanǵa Ramazan aıynda oraza ustaý – paryz.

– Alaıda, jolaýshylarǵa, syrqattanǵan nemese densaýlyǵy jaramaıtyn adamdar dertiniń asqynýynan qaýiptense oraza tutýdy keıinge qaldyrýǵa sharıǵatymyz ruqsat beredi.

Sondaı-aq, júkti nemese omyraýda balasy bar áıelderge de ýaqytsha oraza ustamaýǵa bolady, – dedi Naýryzbaı qajy Taǵanuly.

Eske salsaq bıyl Ramazan aıy 23 naýryzda bastalady.

Qasıetti Qadir túni – 17 sáýirden 18 sáýirge qaraǵan tún.

Al 21 sáýir – Oraza aıttyń birinshi kúni.