Ádette bul monshaǵa oryssha sóileitin Almatynyń «baiyrǵy» turǵyndary kóp keledi. Biz siiaqty aýyldan kelgen «kirme qazaqtar» dýyldap sóilegende olardyń jaratpaityny baiqalyp turady.
Bertinde, Táýelsizdik jyldary salynǵan monshalarda qazaq tildi qaýym býy burqyrap, áńgimesin aityp, dýyldap otyrady ǵoi (Almatydaǵy monshalardyń kóbi qazaqtardyń qolyna ótti emes pe?). Al Tastaqtaǵy monshanyń aýrasy basqa...
Jaqynda sol monshaǵa bardyq. Taýyqtyń uiasyndai par bólmesine bas suqqanymda ishte eki orystyń jas balasy men Almatynyń «baiyrǵy» turǵyny otyr eken.
Jasy jetpiske jetken kókemiz eki orystyń balasyna 1981 jyly benzin tasityn mashinany aidap júrgende jospardy ótirik oryndap, eki-úsh tonna benzindi Sairanǵa kelip tógip-tógip tastaitynyn jyrdai qylyp orys tilinde aityp jatty.
Buryshta otyrǵan aýyl qazaǵy (men ǵoi) túsinbei qalmasyn dep álgi aǵamyz kedir-budyr qazaqshasymen «Vot solai, bizder sondai keń zamanda ómir súrdik» dep aýyr kúrsindi.
Keńes zamanynyń ne ekenin bilmeitin eki orystyń balasy «Bir benzavoz benzindi nege tóktińiz» dep shaldyń áreketin aqylǵa syidyra almai suraq qoiǵanda, shal da úsh-tórt tonna benzindi nege tókkenin durystap túsindire almady. Bar aitqany «ol kezde bári tegin bolatyn...» dep mińgirledi.
Orystyń eki balasy «myna shal aqylynan aljasqan ba?» dep shaldyń betine bajyraia qarady da, jónderine ketti.
Nesin aitasyz, naryqtyq qoǵamnyń júrisine ilese almaǵan mundai shal-shaýqandar eski zamannyń esteligimen ómir súretini belgili ǵoi. Biraq osy kisilerdiń eski zamandy eske salatyn estelikteri jaý shaqyratynyn da umytpaýymyz kerek.
Dál osyndai sátte Táýelsizdikti qasterleitin, ulttyq biregeiligimizdi dáripteitin dúnie kerek ekenin qatty sezinesiń.
Táýelsizdik jyldary qarynnyń qamymen ólshem jasaityn osyndai orystildi qazaqtarǵa azat el bolýdyń qanshalyqty mańyzdy dúnie ekenin túsindirip, olar áńgimelep aitatyn qundylyq qalyptastyryp almaǵanymyzǵa qarnyń ashady.
Al Pýtin osyndai-osyndai jandardyń baryn alǵa tartyp, imperiialyq saiasat óristetýge kúsh salady. Osyndai adamdardy arqalanyp, Simonian men Solovev elimizdiń tutastyǵyn mansuqtap, áńgime aitady.
Bizder osyndai áńgimelerge tosqaýyl qoiý úshin óz ishimizdegi eski kúnniń estilegimen ómir súretin adamdarǵa Táýelsizdiktiń máni men mazmunyn túsindirýimiz kerek sekldi.
Nurlan JUMAHAN
