Sherzat isi boiynsha kináli dep tanylǵan Nurbol Toqtaýbaev sotta jaýap berdi. Qorǵaýshy onyń dúken aldyndaǵy áreketteri men oq atylǵan sáttegi jaǵdaiǵa qatysty birneshe suraq qoidy, dep habarlaidy Dalanews.kz.
— Qamajai dúkeniniń aldyndaǵy jaǵdaidy aityp berińizshi, – dedi qorǵaýshy.
— Men Qarjaýbaidy sabyrǵa shaqyrýmen boldym. Tóbeles ashý oiymda bolǵan joq, – dedi ol.
— Eki qyz boldy. Olar esikti buǵattap, Qarjaýbaidy shyǵarmai jatqanyn kórdińiz be?
— Joq, ondaidy kórmedim. Ol eki qyz dúkenge kirip ketti. Qyzdardyń dúkenge kirgenin ǵana bilemin, – dedi ol.
— Myltyqty naqty kim ákelgenin kórdińiz be?
— Iá, kórdim. Ony Nurǵanat ákelgen bolatyn.
— Myltyqty qai jerden shyǵardy?
— Dúkenniń janynda qara aǵash tur. Sonyń janynda atty.
— Myltyqty kólikten alyp shyqty ma?
— Qarańǵylaý jerden shyqty. Qas-qaǵym sátte boldy. Aiǵailaǵan kezde ǵana kórdim. Sóitip myltyqty aspanǵa, keiin bizge atty.
— Oq atylǵan kezde sizderge bir nárse aitty ma?
— Iá, aiǵailady. Anaiy sózder aitty.
— Oq atylǵan kezde kimniń qai jerde turǵanyn aita alasyz ba?
— Men sol kezde týǵan inime qaradym. Ol qoryqqan kúide mersedes avtokóliginiń artyna tyǵylyp, eshqandai dene jaraqatyn almadym ba dep aiaǵyna qarap turdy. Al Dýman Ysqaqqa "Kólikte otyr!" dep buiyrdym. Ol kólikten shyqpady. Al qalǵandarynyń is-áreketin kórmedim.
— Nurǵanat pen Sherzattyń qulap jatqan jerine ózińiz bardyńyz ba?
— Iá, men ózim bardym. Nurǵanattyń aiaǵynan bir-eki ret tepkenimdi moiyndaimyn. Artynan Darhan alyp ketti. Ózim de qaitaiyn dep turǵanmyn.
— Al videoda ózińizdi tanydyńyz ba?
— Iá, men beinejazbadaǵy óz áreketterimdi quptaimyn. Ótirik aityp, eshteńe qospaimyn.
— Videoda kórinip tur ǵoi. Sol kezdegi sizdiń is-áreketińiz qandai boldy?
— Myltyq atylǵannan keiin abdyrap qaldyq. Tóbeleske kirýge májbúr boldym. Balalar baryp jatqannan keiin men de bardym. Sóitip, Nurǵanatty bir-eki ret teptim.
— Siz tepken kezde Nurǵanat qandai hálde boldy?
— Otyrǵan.
— Al onyń janynda qandai adamdar boldy? Atap aita alasyz ba?
— Joq, esimde joq.
— Al Sherzatty uryp jatqanyn kórdińiz be?
— Men Sherzatty uryp jatqan jerge barmadym. Arasy 4–5 metrdei boldy. Men Nurǵanattyń aiaq jaǵyna qarai bardym. Ar jaǵyna barǵan joqpyn.
— Al búgingi videodan ózińizdi kórdińiz be?
— Ózimdi kórdim. Nurǵanat ber jaǵynda jatty, Sherzat ar jaǵynda jatty. Nurǵanattyń aiaq jaǵyna deiin ǵana bardym. Al eger ary qarai 4–5 metr júretin bolsam, Sherzat jaqqa ótip ketetin edim. Al men ol jaqqa barmadym.
— Al endi jábirlenýshi retinde tanylǵan Bishembievanyń jaýabyn estidińiz. "Meniń bir qolymdy siz ustap turdy", – dedi. Ondai jaǵdai boldy ma?
— Men ol kezde... ol áiel adamdy... Myltyq atylǵannan keiin abdyrap qaldyq qoi. Sol kezde áiel adamnyń daýysy shyǵyp jatty. Men sol jerde tóbeles bolyp jatqan soń, kimniń ákesi, kimniń sheshesi ekenin bilmedim. Jáne Sherzattyń 16 jasta ekenin de bilgen joqpyn. Jalǵan aiǵaq. Men Bishembievanyń qolynan ustamadym. Túrin de kórgen joqpyn.
— Oqiǵada negizi qansha adam boldy?
— Men áiel adamnyń daýysyn ǵana estidim.
