Meirambektiń jaýaby
Birinshiden, Meirambek Besbaev ataqty jazýshynyń óziniń shyǵarmashylyǵy men aitqan sózine qyzyǵýshylyq tanytqanyna tańǵalǵanyn jetkizdi.
– Shynymdy aitsam, sondai úlken kisiler bizderdi oqidy dep oilamappyn. Oiymyzdy qadaǵalaǵany úshin rahmet aitamyn, biraz nazyn aitqan eken. Keleshekte durys bolady dep oilaimyn. Jastardy qansha synai bergenmen, olardyń ishinde de aqyldylary, estileri bar. Bul jerde meni meńzep otyrǵanymen, “kelinim sen tyńda” degen siiaqty áńgime eken. Jalpy maǵan emes, birtalai óner adamdaryna kerekti kóp áńgimeler jazypty. Men endi buǵan Qudai qalasa keńinen jaýap berýge tyrysamyn. Qazir kontsertke daiyndyq ústindemin. Kontsertten keiin asyqpai, múmkin aǵamyzben birge otyryp, ózine tikelei jaýap beretin shyǵarmyn, – dep bastady sózin Meirambek.
Besbaev ónerdegi kemshilikterdi talqylap, teris nárselerge jol bermeý úshin áriptesterimen talai bas qosqanyn aitty. Alaida qolda bilik bolmaǵandyqtan, ol bastamamyz aiaqsyz qaldy deidi ánshi.
– Birneshe jyl buryn talai-talai ózara jinalystar jasaǵanbyz. Onyń ishinde kóptegen óner adamdary boldy. Ánshiler, aǵa býyn ókilderi. Basynda kelisip alamyz da, aiaǵynda aiaqsyz qalyp ketedi. Nege deseńiz, bizde báribir bilik bolmaǵannan keiin jinalyp alyp, mynaý ótsin, mynaý ótpesin dep esh jerde aita almaimyz. Sondyqtan efirge árkim shyǵýǵa quqyly. Sonymen bul másele sol kúii qalyp qoiǵan edi. Endi keleshekte shynymen jany ashityn bilik basyndaǵy, mádeniette, ónerge jaqyn adamdar osyny qolǵa alady dep oilaimyn, – dep túsindirdi Meirambek Besbaev.
Ánshi qazaq estradasyn uiatty jáne uiatsyz ánshilerge bólýiniń sebebin túsindirdi.
– Ózderińiz kórip júrsizder ǵoi, kógildir ekranda ne bop jatqanyn. Ózimiz sol qazanda qainap jatqannan keiin oǵan asa mán bermeitinbiz. Óner adamy, áriptesim dep qaraitynbyz. Qazir áke bolyp, bala-shaǵa tárbielep jatqannan keiin, ol nemen sýsyndar jatyr, bizdiń ekran ne kórsetip jatyr degen siiaqty qadaǵalaimyn. Kóbinese el mýzykalyq baǵdarlamalardy qaraidy, osyndai shoýlar óte kerek. Ol kóbinese estrada juldyzdary, sodan keiin qarasam tárbielik máni bar ma, joq pa degen suraq keldi. Sodan keiin “uiatsyz ánshiler”, “uiaty bar ánshiler” dep bólýge týra keldi, – dep atap ótti Besbaev.
Meirambek Ábiláshimuly ulttyq qundylyqtar týrasyna kelgende kórshiles qyrǵyz, ózbek elderinen úlgi alýǵa bolatynyn aitty.
– Muny toqtatýǵa bolmaidy dep oilamaimyn. Ár halyqtyń moraldyq turǵydan qundylyqtary bar. Mysaly, kórshiles turǵan Ózbekstanda kórkemdik keńessiz birde bir ánshi teledidardan kórsetilmeidi. Endi túbegeili shekteý qoiý kerek demeimin, ol jaqta da zamanaýi nárselerdi kórsetedi. Biraq tárbielik máni bar ma, bizdiń ulttyń joiylyp ketýine sebep bolmai ma degen suraqtarǵa sai saraptap shyǵady. Myna turǵan Qyrǵyz elinde de solai. Kóptegen jerlerdi aralaimyn. Sonda ózindik dástúrin saqtap qalyp, biraq qazirgi zamanǵa sai kreativti jaqsylap jasap jatqan dúnieleri bar. Solai istesek bolady ǵoi bizge de. Zaiyrly memleketpiz dep bárin alyp kep, qalai bolsa solai júre bergen bolmaityn shyǵar, – dep túiindedi sózin ol.
https://dalanews.kz/14758
