Prezıdent Ákimshiliginiń memlekettik qyzmetshilerdiń kommýnıkatıvtik daǵdylaryn jetildirý boıynsha bergen tapsyrmasyn oryndaý aıasynda Memlekettik qyzmet isteri agenttiginiń qoldaýymen Prezıdent janyndaǵy Memleket basqarý akademıasynyń bazasynda qurylǵan medıastýdıanyń ashylý sharasy ótti.

İs-sharaǵa Qazaqstan Respýblıkasy Prezıdentiniń ishki saıasat máseleler jáne komýnıkasıalar jónindegi kómekshisi Rýslan Jeldibaı men MQİA tóraǵasy Darhan Jazyqbaı qatysty.

Ashylý barysynda Rýslan Jeldibaı memleket pen qoǵam arasyndaǵy senimdi nyǵaıtýda memlekettik qyzmetshilerdiń jurtshylyqpen tıimdi komýnıkasıa ornata alý daǵdylaryn únemi damytyp otyrýdyń mańyzdylyǵyn atap ótti.

Zamanaýı medıastýdıa memlekettik qyzmetshilerdi oqytý ádisterin jetildirýge ásirese, jańa tehnologıalardy qoldaný arqyly olardyń pikirtalas, suhbat formatynda sóz sóıleý boıynsha tájirıbesin shyńdaýǵa, olardy is júzinde tıimdi qoldana bilý qabiletin arttyrýǵa yqpal etedi dep kútilýde.

Jańa formattaǵy oqytý prosesin iske asyrý úshin stýdıada Jalinga avtomattandyrylǵan vıdeo jáne grafıkalyq beınelerdi jazý qurylǵysy ornatylǵan, sondaı-aq YouTube, Zoom arqyly onlaın-konferensıalarǵa qosylý, kásibı podkast jazý alańy qarastyrylǵan.

Shara aıasynda memlekettik qyzmetshilerdiń biliktiligin arttyrý jáne olardy qaıta daıarlaýǵa arnalǵan sıfrlyq kovorkıng zalynyń jumysy da tanystyryldy.