Qasym-Jomart Toqaevtyń Qaraǵandy oblysyna jumys sapary Temirtaý qalasyndaǵy Qarmet metallýrgiialyq kombinatyn aralap kórýden bastaldy, dep habarlaidy Dalanews.kz.
Prezident №3 domna peshiniń jumysymen tanysty. Munda jylyna 3,8 million tonna shoiyn óndiriledi.
“Qarmet” aktsionerlik qoǵamy Direktorlar keńesiniń tóraǵasy Andrei Lavrentev pen kásiporynnyń bas direktory Vadim Basin óndiristi damytý úshin atqarylǵan jáne júzege asyrylyp jatqan jobalar jóninde baiandady. Bul maqsatqa 3,5 milliard dollardan astam qarjy qarastyrylǵan. Budan bólek 500 million dollar shamasynda Kómir departamentindegi jáne 978 million dollar kóleminde Temir rýdasy departamentindegi jobalarǵa qosymsha investitsiia quiý josparlanǵan.
Kásiporyn ǵimarattar men nysandarǵa aýqymdy jóndeý jumystaryn júrgizip jatyr. Biylǵy jańǵyrtý baǵdarlamasyna 100-den astam nysan engen. 50 myń sharshy metr shatyr aýystyrylýda. Sonymen qatar buǵan deiin qabyldanǵan "Tazalyq" baǵdarlamasyna sáikes 120 sanitariialyq-turmystyq ǵimaratqa kúrdeli jóndeý júrgizile bastady.
Memleket basshysyna sliab pen bliým shyǵaratyn №2 konvertorlyq tseh pen metall ázirlemelerin úzdiksiz quiý mashinasynyń jumysy tanystyryldy. Kásiporyn basshylyǵy búginde mekemeniń tehnikalyq jaǵdaiyn babynda ustap turý, jóndeý júiesin, sondai-aq kristaldandyrǵysh ainalym júieleri men barlyq mashina segmentterin jetildirý basty mindet ekenin atap ótti. Kelesi jyly basqarý jáne gidravlika júielerin jańǵyrtý jumystary atqarylmaq.
Andrei Lavrentevtiń aitýynsha, iske asyrylyp jatqan jobalar kombinat jumysyn turaqtandyryp, kompaniianyń “5-9-5” baǵdarlamasynyń oryndalýyna boljam jasaýǵa múmkindik berdi. Qabyldanǵan strategiiaǵa sáikes kásiporyn 2028 jylǵa qarai jylyna 5 million tonna bolat shyǵarýdy, 9 million tonna kómir jáne 5 million tonna temir rýdasy kontsentratyn óndirýdi josparlap otyr. Bul 2023 jylǵy kórsetkishtermen salystyrǵanda orta eseppen 66 paiyz ósimdi qamtamasyz etedi.
Memleket basshysy kombinatty tabiǵi gazǵa kóshirý mańyzdy sheshim ekenin atap ótti. Bul bastapqy kezeńde qorshaǵan ortaǵa keletin ziiandy 30 paiyzǵa tómendetýge múmkindik beredi. Biyl kúzde Temirtaý qalasynda ekologiialyq taza kólik túri – tramvai jelisi qalpyna keltiriledi.
Prezident ónerkásip qaýipsizdigi, óndiristiń tiimdiligin arttyrý jáne jańǵyrtý, aimaqtyń ekologiialyq ahýalyn jaqsartý baǵytynda júzege asyrylyp jatqan jobalardyń merzimi men joǵary sapa standarttaryn qatań saqtaý qajet ekenine basa nazar aýdaryp, birqatar naqty tapsyrma berdi.
“Biz otandyq investordy shaqyrý arqyly durys sheshim qabyldadyq. Olar birden iske kiristi. Kombinattaǵy jaǵdai burynǵymen salystyrǵanda aitarlyqtai jaqsarǵan. Biraq munymen shektelýge bolmaidy. Eń basty mindet – Qarmet kásipornynyń baiaǵy dańqyn qaitaryp, áleýmettik máselelerdi sheshýge basa mán berý. Bul baǵyttaǵy jumys bastalyp ketti. Odan habardarmyn. Men kombinatqa jyl saiyn kelip, onyń damý barysymen tanysyp turamyn”, – dedi Qasym-Jomart Toqaev.
Qazirgi kezde “Qarmet” aktsionerlik qoǵamynda 34 myńnan astam jumysshy eńbek etedi. Metallýrgiialyq kombinattyń óndiristik qýaty jylyna 5,3 million tonna bolat óndirýge jetedi. Byltyr kásiporyn 2,9 million tonna daiyn ónim shyǵarǵan. Onyń 2,1 million tonnasy Resei, Qytai, Ózbekstan, Qyrǵyzstan, Tájikstan, Túrikmenstan, Grýziia, Ázerbaijan jáne Aýǵanstan elderine eksporttaldy.
Budan soń Memleket basshysy Qarmet Kreativti tehnologiialar ortalyǵyn aralap kórdi. Atalǵan ortalyq metallýrgter qalasynyń belsendi ári shyǵarmashyl jastarynyń basyn qosatyn orynǵa ainaldy.
Prezidentke “Qarmet” aktsionerlik qoǵamynyń profildik emes aktivterdi basqarý jónindegi direktory Almas Siranov Ortalyqta robotty tehnika, avtomodeldeý, ushqyshsyz basqarylatyn drondar sektsiialary, baǵdarlamalaý, blogerler, jýrnalistika, dokýmentalistika mektepteri, podkast stýdiiasy jáne basqa da shyǵarmashylyq baǵyttaǵy úiirmeler ashylǵanyn jetkizdi. Onyń aitýynsha, Ortalyq tek metallýrgiialyq kombinattyń ǵana emes, Temirtaý qalasynyń kórnekti nysanyna ainalady. Munda jastar kásibi baǵdar alyp, ózderiniń injenerlik daǵdylaryn shyńdaidy.
Prezident kásiporyn jumysshylarymen jáne ardagerlerimen, sondai-aq kásipodaq ókilderimen áńgimelesý barysynda eńbek adamy eń joǵary qurmetke laiyq ekenin atap ótti. Bul rette memleket tarapynan olardyń ál-aýqatyn jaqsartý úshin barlyq jaǵdai jasalyp jatqanyn jetkizdi.
