Álem birinshilikterinde top jarǵan elimizdiń jas shahmatshylary memleket basshysymen kezdesti, dep habarlaıdy Dalanews.kz

Kezdesýge 8 jasqa deıingi sanatta álem chempıondary atanǵan Ádınur Ádilbek pen Alısha Bısalıeva, 12 jasqa deıingi sanatta álem chempıony bolǵan Danıs Qýandyquly, 14 jasqa deıingi sanatta álem birinshiliginde jeńis tuǵyrynan kóringen Mark Smırnov, 16 jasqa deıingi sanat boıynsha álem chempıonatynda altynnan alqa taqqan Edgar Mamedov, 16 jasqa deıingi shahmatshylar arasynda álem birinshiliginiń kúmis júldesine qol jetkizgen Saýat Nurǵalıev qatysty.

Memleket basshysynyń aıtýynsha, jas sportshylardyń jetistikteri halyqaralyq arenada Qazaqstannyń mereıin ústem etedi ári elimizde shahmattyń keleshegi zor ekenin kórsetedi. Prezıdent chempıondardyń bıik maqsattarǵa umtylýy qajettigin jetkizip, olarǵa jarqyn jeńister tiledi.

– Shahmat degen úlken óner. Sondyqtan shahmatpen kúndelikti, muqıat, arnaıy kitaptardy oqı otyryp aınalysý qajet. Búgin Halyqaralyq shahmat federasıasynyń prezıdenti Arkadıı Dvorkovıchpen kezdesip otyrsyzdar. Bul – Sizderdiń baqytty sátterińizdiń biri, – dedi Memleket basshysy.

Kezdesý sońynda Qasym-Jomart Toqaev shahmat taqtasyna estelik jazba qaldyrdy.