Qazaqstanda mektepterde aqsha jinaýǵa zańmen tyiym salý qarastyrylyp jatyr – dep habarlaidy Dalanews.kz.
Oqý-aǵartý ministri Ǵani Beisembaev mektepterde aqsha jinaý máselesi zańnamalyq deńgeide rettelýi múmkin ekenin málimdedi. Ministr ata-analar komitetterin taratýǵa bolmaitynyn da aitty.
"Ata-analar komiteti uzaq jyl boiy bar. Tek aqsha jinaý men is-sharalardy ótkizýden góri olardyń qyzmetin túrlendirip, kúsh-jigerin tiimdirek jáne nátijeli mindetterge baǵyttaý qajet", - dedi ol.
Ǵani Beisembaev bul baǵytta jumystar qazirdiń ózinde bastalyp ketkenin jetkizdi.
"Byltyrdan bastap ádistemelik nusqaýlar ázirlendi. Ata-analarǵa qajetsiz is-sharalardy ótkizýge ýaqyt jumsamai, balalardy kóbirek qoldaýǵa kómektesý úshin synyp jetekshilerine arnalǵan treningter ótkizilip jatyr", - dedi ol.
Sondai-aq, ministr aqsha jinaýǵa tyiym salýǵa qatysty tiisti buiryq qabyldanǵanyn, biraq áli iske asyrylmai jatqanyn alǵa tartty.
"Buiryq burynnan bar. Tek ony oryndaý kerek. Qajet bolsa, depýtattarmen keńesemiz. Eger muny zań arqyly retteý kerek bolsa, onda buǵan mektepke deiingi balalar uiymdaryn litsenziialaý siiaqty keletin shyǵarmyz. Degenmen mundai máseleniń bárin zańmen retteý kerek pe, joq pa qaraý kerek",- dedi Beisembaev.
