Túrkistan oblysy Shámshi Qaldaıaqov atyndaǵy fılarmonıanyń ánshisi Narkenje Serikpaeva mádenıet salasyndaǵy problemalar men basshylyq tarapynan kórsetilgen qysym týraly ashyq málimdedi, dep habarlaıdy Dalanews.kz.
"Men bosqa shyryldap, haıp izdep júrgen ánshi emespin. Ónerge janym ashyǵandyqtan ashynyp aıtamyn. Shyndyq dep shyryldap júrgen qazaqtyń bir qyzymyn", – dedi Serikpaeva.
Ol ózi qyzmet etetin fılarmonıany "qara shańyraq" dep atady. Aıtýynsha, aldaǵy shilde aıynyń 11-inde fılarmonıa ujymy Ispanıaǵa konserttik baǵdarlamamen barýy tıis. Alaıda shetelge shyǵar aldynda kıim máselesin kótergeni úshin qysymǵa ushyraǵanyn málim etti.
"Sol jaqqa bararda kıim máselesin rettep berińiz degen sózim basshyǵa jaqpaı, qysym kórsetip jatyr", – dedi ol.
Ánshiniń aıtýynsha, fılarmonıa dırektory Ǵalymjan esimdi azamat oǵan konsertke qatyspaısyń dep talap qoıǵan.
"Búgin basshymyz Ǵalymjan myrza maǵan fılarmonıa konsertine shyqpaısyń dep talap qoıyp otyr. Nege? Ne úshin? Jeke kesh berip, el aralap júrgen men shyqpaǵanda kim shyǵady?" – dep ashyna surady ol.
Narkenjeniń aıtýynsha, fılarmonıa basshylyǵy ónerpazdardyń shetelge laıyqty ulttyq kıimmen shyǵýyn qamtamasyz etýge mindetti.
"Dımashty álem tanydy. Dombyrasymen, qazaqsha kıimimen. Álem qazaq ónerine kóz tigip otyrǵan sátte, prokattan alynǵan, jamaý-jamaý kıimmen emes, uıalmaı kıip shyǵatyn, qazaqtyń bolmysyn kórsetetin kıim tigý kerek emes pe?" – dedi ol.
Ánshiniń sózine qaraǵanda, shetelge shyǵý úshin árbir ónerpazǵa shamamen 500 myń teńge qajet (jol aqysy, vıza jáne t.b.). Ol bul somaǵa ár ánshige kemi eki kóılek tiktirýge bolatynyn aıtady.
Serikpaeva fılarmonıa basshysynyń ujymǵa dóreki sóıleıtinin de jasyrmady. Bul jaǵdaı onyń jeke basynyń emes, jalpy ónerpazdardyń máselesi ekenin atap ótti.
"Aılyǵy shaılyǵynan aspaıtyn, arasynda qashyp, tyǵylyp toıǵa shyǵyp qaıtatyn ánshi kıimin tiktire me? Ánin jazdyra ma? Kredıtin tóleı me?" – dep kóptiń janaıqaıyn jetkizdi.
Ol osy máselege baılanysty Túrkistan oblysynyń ákimi Nuralhan Oralbaıulynan kómek surap, jeke qabyldaýyn ótindi.
"Meni qabyldasańyz, aıtarym kóp. Bizdiń fılarmonıanyń qazirgi jaı-kúıinen habar alyńyz. Mádenıetimizdi kimderdiń qolyna berip otyrǵanyńyzǵa mán berińizshi", – dep túıindedi ánshi.
Taǵy bir úndeýinde Narkenje Serikpaeva kóp qysym kórip kele jatqanyn aıtady.
Maǵan “konsertke qatyspaısyń, seniń kıimiń joq” dep jáne mahabbattar jaıly áńgime aıtty. Uıat ta bolsa aıtaıyn, “meniń aldyma kelip otyr, men seni ıiskeýim kerek” degen áńgimeniń bárinen ótip kele jatyrmyn. Qurmetti ákim myrza, osy máseleni qolǵa alýyńyzdy suraımyn. Jalpy men ǵana emes, qazaq qyzdarynyń kóbi sondaı basshylardyń astynda ketip bara jatyr, deıdi ánshi.
Bul jaıtqa qatysty Túrkistan qalasynyń mádenıet basqarmasy pikir bildirdi.
"Shámshi Qaldaıaqov atyndaǵy oblystyq fılarmonıa ánshisi, QR Eren eńbegi úshin medaliniń ıegeri N.Serikbevanyń áleýmettik jelidegi synı jazbasyna sáıkes kelesideı habarlaımyz. Ondaǵy kóterilgen máselelerdi anyqtaý maqsatynda basqarma tarapynan shuǵyl komısıa qurylyp, zerdeleý jumystaryn júrgizý boıynsha tapsyrma berildi. Komısıa jumysynyń nátıjesinen soń resmı jaýap beriledi", - deıdi basqarma ókilderi.
