Senat Tóraǵasy Máýlen Áshimbaev «Senat Open» – QR Parlamenti Palatasynyń Ashyq shahmat kýbogynyń finaldyq kezeńiniń saltanatty ashylý rásimine qatysty. Sporttyq jarystar búkil el boiynsha 3 000-nan astam shahmat áýesqoilaryn biriktirdi,- dep habarlaidy Dalanews.kz
Týrnirdiń finaldyq kezeńine elimizdiń barlyq óńirinen kelgen qatysýshylardy quttyqtaǵan Máýlen Áshimbaev Memleket basshysynyń tapsyrmasy boiynsha sońǵy jyldary respýblikada shahmatty damytýǵa, oiyndy kásibi jáne áýesqoi deńgeide úirenýge jaǵdai jasaýǵa airyqsha kóńil bólinip otyrǵanyn atap ótti.
«El prezidenti Qasym-Jomart Kemeluly Toqaev shahmatty nasihattaýǵa erekshe mán beredi. Memleket basshysy aiqyndaǵan mindetter aiasynda júieli jumys júrgizilip jatyr. 2027 jylǵa deiingi Shahmatty damytý jónindegi keshendi jospar ázirlenip, qabyldandy. Qazaqstan Parlamenti Senaty men Shahmat federatsiiasy birlesip uiymdastyrǵan búgingi týrnir de osy baǵyttaǵy mańyzdy qadam bolyp sanalady. «Senat Open» respýblikalyq týrniri ekinshi ret ótkizilip otyr, jyl saiyn oiynǵa qyzyǵýshylyq aitarlyqtai artyp keledi. Mundai jobalardyń azamattardyń ziiatkerlik áleýetin damytýda jáne memlekettik basqarý salasyn qosa alǵanda qajetti daǵdylardy qalyptastyrýda airyqsha mańyzy bar dep esepteimiz», – dedi Senat Tóraǵasy óz sózinde.
Aita keteiik, týrnirdiń alǵashqy kezeńi Qazaqstannyń barlyq oblystarynda 21 aqpan men 27 mamyr aralyǵynda ótken 20 irikteý týryn qamtydy. Ekinshi kezeńde osy aimaqtar boiynsha bes jartylai final ótti: 25 maýsymda Túrkistanda (Ońtústik), 29 maýsymda Semeide (Ortalyq), 4 shildede Kókshetaýda (Soltústik), 23 shildede Oralda (Batys) jáne 9 tamyzda Taldyqorǵanda (Shyǵys). Finalǵa 215 qatysýshy joldama aldy.
Sonymen qatar, Qazaqstan shahmat federatsiiasynyń prezidenti Timýr Týrlovtyń pikirinshe, týrnir shahmatshylardyń kásibi sheberligin arttyrýǵa da, tájiribe almasýǵa jáne qatysýshylardyń kásibi bailanystaryn nyǵaitýǵa da jaqsy múmkindik boldy.
«Bizdiń týrnir el aýzynda, ol turaqty túrde damyp, ósip keledi. Bul – onyń uiymdastyrylýyna úlken jaýapkershilikpen qaraityn Parlament Senaty men Shahmat federatsiiasy komandasynyń eńbegi. Sondai-aq oblystardan kelgen barlyq qatysýshylardyń da úlesi zor. Men úshin bul týrnirdiń orny bólek. Onyń ózindik stili, jany bar jáne eń bastysy – aiqyn áleýmettik missiiasy bar. Ol kásibi bailanysty jáne jeke dostyqty nyǵaitý alańyna ainaldy. Ol halqymyzǵa jaqyn tabandylyq, adal kúres, kóshbasshylyqqa umtylý jáne úlkenderdi qurmetteý siiaqty qundylyqtar ómir súretin platformaǵa ainaldy», – dedi Timýr Týrlov.
Atalǵan oiyndy nasihattaý aiasynda biyl mektep baǵdarlamasyna «Shahmat negizderi» páni engizilgenin de aita ketken jón. Ol 60 myńnan astam oqýshyny qamtyp, jańa mádenietti, analitikalyq daǵdylardy qalyptastyrýǵa jáne jan-jaqty damýǵa yqpal etýde.
