Almaty qalasy Medeý aýdandyq 2-sotynyń sýdiasy Anina Baidáýletova Qazaqstan jýrnalister odaǵynyń basqarma tóraǵasy ári ulttyq baspasóz klýbynyń basshysy Seiitqazy Mataevty úiqamaqqa shyǵarýǵa úkim etti.
Mataevqa otbasy músheleri men advokatynan ózge adamdarmen sóilesýge tyiym salynǵan, sondai-aq onyń telefon men internetti paidalanýǵa da quqyǵy joq. Mataevtyń turǵylyqty jeri kúzetiledi. Osylaisha sýdia prokýratýranyń «Seiitqazy Mataevqa qatysty bultartpaý sharasyn úiqamaqqa aýystyrý týraly ótinishin» qanaǵattandyrdy.
Al Mataev ózin úiqamaqqa shyǵarýdy emes, eshqaida ketpeý týraly qolhatpen jiberýdi suraǵan.
"Sottan ózimniń kináli emes ekenimdi dáleldeýge múmkindik berýdi suraimyn. Bul eń aldymen ózim úshin, meniń abyroiymdy saqtap qalý úshin qajet. Men elden eshqaida keteiin dep otyrǵan joqpyn. Taǵylǵan aiypty tolyǵymen moiyndamaimyn, sondyqtan ózimdi qorǵaýǵa múmkindik berseńiz. Al úiqamaqta bolsam, ondai múmkindik bolmaidy",- dedi Seiitqazy Mataev.
Seiitqazy Mataevty korrýptsiiaǵa qarsy is-qimyl ulttyq biýrosynyń Almaty qalalyq departamenti "biýdjet qarjysyn jymqyrdy" jáne "salyq tóleýden jaltardy" degen kúdikpen ustaǵan. Onymen birge tańerteń departamentke uly, QazTAG aqparat agenttigi basshysy Áset Mataev ta aparylǵan. Ol jerde birer saǵat tergeýden soń Áset Mataev bosatylǵan.
Korrýptsiiaǵa qarsy is-qimyl biýrosy Mataevtardan memlekettik saiasatty aqparattyq nasihattaý úshin bólingen biýdjet qarjysyn jymqyrdy dep kúdiktenedi. Biraq Mataevtar ózderine taǵylǵan aiypty moiyndamaidy jáne oqiǵany "úkimettik emes uiym men aqparat quralyna qysym jasaý áreketi" dep baǵalaidy.
Mataevqa telefonmen sóilesýge, internetti paidalanýǵa, týystarynan ózge adamdarmen áńgimelesýge tiym salynǵan. Arnaiy kúzet te ornalastyrylǵan.
Úiqamaqta qansha ýaqyt otyratyny belgisiz. Ony tergeý amaldarynyń merzimi belgileidi.
