– Aýmaqtyq kúshtik organdar basshylarynyń bilikti asyra paidalanýy týraly faktilerge jeke toqtalǵym keledi. Jappai tártipsizdikter shegine jetken kezde Almaty qalasy, Almaty oblysy men Qyzylorda oblysynyń Ulttyq qaýipsizdik komiteti departamentteriniń jeke quramynyń barlyǵy óz ǵimarattaryn tastap ketken, – dedi Berik Asylov.
Tergeý málimeti boiynsha 5 qańtarda jeke quramnyń ǵimarattan ketýge daiyndalýy kerektigi jóninde Ulttyq qaýipsizdik komiteti tóraǵasynyń orynbasary Sadyqulovtyń nusqaý kelip túsken.
– Másimovtiń tapsyrmasy boiynsha Almaty qalasy men Qyzylorda oblysynyń Ulttyq qaýipsizdik komiteti departamentteriniń jeke quramy jumys oryndaryn tastap ketken. Sondai-aq, basshylyqtyń nusqaýy boiynsha Almaty jáne Jambyl oblystarynyń Politsiia departamentteri óz ǵimarattaryn tastap ketken. Týrasyn aitqanda, osy basshylar álsizdik tanytty. Bul óz kezeginde jeke quramnyń rýhyn túsirdi. Sonyń saldarynan tártipsizdiktiń jolyn kesý boiynsha sharalar ýaqtyly qabyldanbaǵan, – dedi Bas prokýror.
Osy oraida ol Almaty men Taldyqorǵan 2 kún boiy qarýly sodyrlardyń biliginde bolǵanyn aitty. Olar qarý-jaraqtyń úlken arsenaly – 3 myńǵa jýyq avtomat, pistolet, snaiperlik vintovka jáne on myńdai oq-dárini tonap ketti.
Basshylardyń kesirinen eń qaýipti atys qarýlary búlikshilerdiń qolyna ótken.
– Áli kúnge deiin 2 myńǵa jýyq qarýdyń qaida ekeni belgisiz. Arnaiy prokýrorlar bilikti asyra paidalanýdyń osy faktileri boiynsha tergeýdi aiaqtady. Ulttyq qaýipsizdik komitetiniń 3 aýmaqtyq departamentiniń eks-basshylary, Almaty oblysy Politsiia departamentiniń burynǵy bastyǵy jáne basqa adamdarǵa qatysty qylmystyq ister sotqa joldandy. Qazir sot talqylaýy bolyp jatyr. Olardyń kinásiniń dárejesi men jaza túrin sot anyqtaidy, – dedi Berik Asylov.
Onyń sózine qaraǵanda, Jambyl oblysy Politsiia departamentiniń eks-bastyǵyna qatysty qylmystyq qýdalaý toqtatyldy.
