Ulttyq qaýipsizdik komitetiniń eks-tóraǵasy Kárim Másimovtiń Prezident Qasym-Jomart Toqaevtan keshirim berýdi suraǵan ótinishi Prezident janyndaǵy keshirim jasaý máseleleri jónindegi komissiiaǵa áli jetpegen kórinedi. Bul týraly komissiia tóraǵasy, májilis depýtaty Marat Bashimov "Azattyqqa" málimdedi, - dep habarlaidy Dalanews.kz.
"Komissiiaǵa ótinishi jetkennen keiin ol naqty túrde qaralady. Konstitýtsiia boiynsha ár azamattyń komissiiaǵa aryzdanýǵa quqyǵy bar. Biraq onyń óz júiesi bar. Birinshi aryz túsedi, keiin ony Joǵarǵy sotqa, Bas prokýratýraǵa, Ishki ister ministrligine, óziniń otyrǵan jerine jiberedi. Sebebi aqparat jinaý kerek. Keiin ony komissiia otyrysynda qaraidy. Sodan soń oǵan daýys berip, sheshim shyǵaryp, Prezidentke jiberedi", - dedi Bashimov.
Buǵan deiin Másimov ótinishti 2024 jyly naýryzda joldaǵany belgili bolǵan edi.
"Quqyq organdaryna da bir ai beriledi. Ýaqyttyń óz reti bar", - deidi Bashimov.
Aita keteiik, buǵan deiin memleketke opasyzdyq jasaǵany jáne bilikti basyp alýǵa tyrysqany úshin sottalǵan Ulttyq qaýipsizdik komitetiniń burynǵy basshysy Kárim Másimov keshirim jasaý týraly ótinish bergeni málim boldy.
Bul týraly QR Ulttyq qaýipsizdik komiteti Informburo.kz-ke málimdegen. Qazir Kárim Másimov Sybailas jemqorlyqqa qarsy is-qimyl agenttiginiń qaýlysy negizinde Astanadaǵy UQK tergeý izoliatorynda otyr.
"Shynynda da, ol osy mekemeden 2024 jylǵy naýryzda Qazaqstan Respýblikasy Prezidentiniń atyna keshirim jasaý týraly ótinish joldady", - dep habarlaǵan UQK.
Vedomstvoda Másimovke qatysty Qylmystyq kodekstiń 218-baby, 3-bóligi, 3-tarmaǵy jáne 366-baby, 4-bóligi boiynsha sotqa deiingi tergep-tekserý jalǵasyp jatqany aityldy.
2023 jyly 24 sáýirde Astananyń qylmystyq ister jónindegi mamandandyrylǵan aýdanaralyq soty QR Ulttyq qaýipsizdik komitetiniń eks-tóraǵasy Kárim Másimovke, Ulttyq qaýipsizdik komiteti tóraǵasynyń eks-orynbasarlary Ánýar Sadyqulov, Dáýlet Erǵojin, Marat Osipovke qatysty qylmystyq is boiynsha úkim shyǵarǵan bolatyn.
Sot isti "Asa qupiia" degen belgimen qarady. Kárim Másimov QR Qylmystyq kodeksiniń 175-babynyń 1-bóligi, 179-babynyń 3-bóligi, 362-babynyń 4-bóliginiń 3-tarmaǵy boiynsha kináli dep tanylyp, 18 jyl bas bostandyǵynan airyldy. Sonymen qatar, memlekettik qyzmette ómir boiy qyzmet ete almaityny jáne múlki tárkilenetini aityldy. Kárim Másimov buǵan qosa general sheni men memlekettik nagradalarynan aiyryldy.
Al onyń orynbasary Dáýlet Erǵojin Qylmystyq kodekstiń 179-babynyń 3-bóligi, 362-babynyń 4-bóligi 3-tarmaǵy boiynsha kináli dep tanylyp, 15 jylǵa bas bostandyǵynan aiyryldy.
Keiin apelliatsiialyq saty K.Másimovke, A. Sadyqulovqa jáne D. Erǵojinge qatysty birinshi satydaǵy sot úkimin qaýipsizdigi eń joǵary mekemeden qaýipsizdigi ortasha mekemede jazasyn óteý boiynsha ózgertti.
