Qalalyq polısıa departamenti Q. esimdi azamattan Ǵabıdolla Ábdirahymovqa qatysty aryz túskenin rastady.
"Atalǵan derek QR Qylmystyq kodeksiniń 190-babynyń 4-bóligimen (alaıaqtyq, bótenniń múlkin jymqyrý nemese aldaý nemese senimdi teris paıdalaný jolymen bóten múlikke quqyqty ıemdený) sotqa deıingi tergep- tekserýdiń biryńǵaı tiziminde tirkeldi.
Qylmystyq is boıynsha óndiristi Almaty qalasy qylmystyq izdestirý departamentiniń tergeý basqarmasy júrgizip jatyr.
Onyń qorytyndysy boıynsha sońǵy prosesýaldyq sheshim qabyldanady", – dep habarlady Almaty qalalyq polısıa departamentiniń baspasóz qyzmeti.
...
Al ZTB telegram-arnasynyń jazǵanyndaı Shymkenttiń eks-ákiminen bólek, qazir qamaýda jatqan UQK-nyń eks-tóraǵasy Kárim Másimovtyń ústinen de aryz túsken.
Másimov pen Ábdirahymovqa qatysty shaǵymdy Alageum Group kompanıasynyń qojaıyny Saıdolla Qojabaev joldapty.
Onyń aıtýynsha Shymkenttiń eks-ákimi men UQK-nyń eks-tóraǵasy jáne taǵy birneshe adam Qojabaevtan 2-3 mln dollar talap etken. Bylaısha aıtqanda, reıderlikpen aınalysqan.
Kásipker álgi qarajatty taýyp berýge májbúr bolǵan. Másimov pen Ábdirahymov bastaǵan toptyń kásipkerdi ne úshin bopsalaǵany aıtylmaıdy.
...
Buǵan deıin mamyr aıynyń ortasyna taman jýrnalıs Mıhaıl Kozachkov "Mádenıet jáne sport eks-vıse-mınıstri Ǵabıdolla Ábdirahymovtyń ústinen "reıderlik" baby boıynsha qylmystyq is qozǵalǵanyn» habarlaǵan edi.
Alaıda bul aqparatty Ábdirahymovtyń ózi joqqa shyǵaryp, úndeý jasaǵan.
Ǵabıdolla Ábdirahımov 1975 jyly 23 qańtarda Qazaqstannyń ońtústiginde dúnıege kelgen. 1996 jyly Qazaq memlekettik agrarlyq ýnıversıtetinen ekonomıs-býhgalter mamandyǵyn alyp shyǵady. 1997-1999 jyldary «Bolashaq» baǵdarlamasy boıynsha Nemis Joǵary memlekettik basqarý mektebinde oqıdy.
Tórt tildi meńgergen Ábdirahımov ár jyldary Qazaqstannyń laýazymdy qyzmetterin atqardy. Atap aıtsaq, QR Memlekettik qyzmet isteri agenttigin, QR Básekelestikti qorǵaý agenttigin basqardy, Premer-Mınıstr Keńsesiniń Basshysy, Qazaqstan Prezıdenti Ákimshiligi Basshysynyń orynbasary boldy.
Shymkent qalasynyń ákimi qyzmetin atqardy. «Nur Otan» partıasynyń hatshysy, QR Premer-Mınıstriniń keńesshisi, QR Mádenıet jáne sport vıse-mınıstri bolyp ta qyzmet atqardy.
2019 jyly 30 shildede ol Shymkent qalasynyń ákimi qyzmetinen alyndy.
Sol kezdegi Prezıdent Ákimshiligin basqarǵan Qyrymbek Kósherbaev Ǵabıdolla Ábdirahımov týraly: «Ony elimizdegi eń laýazymdy ári jaýapty qyzmetterge taǵaıyndady. Ókinishke qaraı, muny ózi jetkilikti túrde uǵynǵan joq», - dep pikir bildirgen.
"Zyń-zyń" ákim ázir jumyssyz. Álemjelidegi sońǵy jazbalarynyń birinde Ábdirahymov prezıdent Toqaevtyń saıasatyn qoldaıtynyn aıtqan.
"Referendým — demokratıanyń mańyzdy ınstıtýty ekenin eskersek, endi halyqtyń talap-tilegi tikeleı eskerilip, oryndalmaq! Basty jeńis — osy", – degen edi Shymkenttiń eks-ákimi.
