Fort-Shevchenko, Qyzylózen, Atash jáne Baýtino aýyldarynyń jaǵalaýynda monitoring júrgizý kezinde óli qustar anyqtaldy. Bul týraly Mańǵystaý oblystyq orman sharýashylyǵy jáne janýarlar dúniesi aýmaqtyq inspektsiiasy málimdedi, dep habarlaidy Dalanews.kz.
"Territoriiany aýmaqtyq inspektsiia qyzmetkerleri, balyq inspektsiiasy jáne tabiǵatty qorǵaý politsiiasy teksergen. Tekserý barysynda jaǵalaýdyń ártúrli jerinen 13 óli qus tabylǵan, olardyń arasynda qazdar, baklan jáne qaiyqshaqtar (chaika) bar. Degenmen laboratoriialyq taldaý úshin úlgiler alý múmkin bolmady, sebebi qustardyń denesi shirip ketken", – delingen habarlamada.
Aýmaqtyq inspektsiia óli qustardyń qaldyqtaryn shyǵarý jáne joiý boiynsha jumystar júrgizý týraly aýdan ákimdigine habarlama joldaǵan. Monitoring jumystary áli de jalǵasýda.
Eske salaiyq, jaqynda Kaspii teńizi jaǵalaýynan 112 óli itbalyqtyń denesi tabylǵan edi. Bul týraly oblystyq ekologiia departamenti málimdedi.
Itbalyqtardyń óli deneleri Asan aýylymen Baýtino múiisiniń aralyǵynan tabylǵan. Ekologtar teńiz sýynan synama alyp, zerthanalyq taldaýǵa jiberdi.
Aita keteiik, buǵan deiin Kaspii teńizi jaǵalaýynda balyqtar jappai qyrylǵan edi.
Fort-Shevchenko qalasynyń Túpqaraǵan aýdany aýmaǵynda teńiz jaǵalaýynan tabylǵan óli balyqtardyń videosy áleýmettik jelilerge jariialandy.
7 shilde kúni oqiǵa ornyna oblystyq ekologiia departamentiniń zerthanalyq-taldamalyq baqylaý bóliminiń mamandary bardy. Olar balyq sharýashylyǵy basqarmasynyń qyzmetkerlerimen birge teńiz sýynan synamalar aldy.
Ekologtar zertteý nátijelerin qosymsha habarlaitynyn aitty.
