Mańǵystaýda prokýratýra 1,4 mlrd teńgeni zańsyz jumsamaq bolǵan shendilerdiń jolyn kesti. Osylaisha iri kólemdegi biýdjet qarajatyn negizsiz jumsaýdyń aldyn aldy, dep habarlaidy Dalanews.kz KTK arnasyna silteme jasap.
Aqtaýdy sýmen, jylýmen qamtamasyz etetin monopolist “Maek” kompaniiasynyń memlekettik satyp alý konkýrsynda óreskel talaptardy buzǵany anyqtaldy. Kombinat basshylyǵy óndiriske paidaǵa aspaityn qurylǵyny alǵysy kelgen.
Osy maqsatta kásipkerlik nysanmen bir kózden alý tásilimen negizsiz shart jasasqan. Sot sheshimimen kelisim jaramsyz dep tanyldy. Kináli tulǵalar tártiptik jaýapqa tartylyp, birqatar basshy qyzmetinen bosatylǵan.
“Qosymsha alýǵa qural-jabdyqtar josparlaǵan. Biraq protsedýralaryn zańsyz jasaǵan. Sondyqtan prokýrorlyq qadaǵalaý aktisin engizdik. Qazir kelisimsharttar jaramsyz dep tanyldy.
“Maektyń” orynbasary ornynan bosatyldy jáne eki basshylyq qyzmettegi laýazymdy tulǵa tártiptik jaýapqa tartyldy”, - dedi Mańǵystaý oblysy prokýratýrasy basqarma bastyǵy Mergen Meńdiǵaliev.
