Mańǵystaý oblysynda qumar oiyn oinaǵan eki memlekettik qyzmetshi jumystan shyǵaryldy. Bul týraly QR Memlekettik qyzmet isteri agenttiginiń óńirlik departamentiniń basshysy Toqtamys Jumaǵulov málimdedi, dep habarlaidy Dalanews.kz.
Toqtamys Jumaǵulovtyń aitýynsha, óńirde memlekettik qyzmetshilerdiń óz mindetin tiisinshe atqarmaýy jii baiqalady, bul azamattardyń narazylyǵyn týdyryp otyr.
“Búgingi dóńgelek ústelde memlekettik qyzmet bedeline nuqsan keltiretin jaǵdailar, etikalyq normalardyń buzylýy jáne qyzmetshilerge qoiylǵan shekteýlerdiń saqtalýy máseleleri qaraldy. Ókinishke qarai, oblysta eki memlekettik qyzmetshiniń qumar oiynǵa qatysqany anyqtaldy. Olardyń ekeýi de teris sebeptermen jumystan bosatyldy”, – dedi ol.
Sonymen qatar Jumaǵulov óńirde memlekettik qyzmetshilerdiń esirtki zattaryn qoldanýyna qatysty derekter de tirkelgenin aitty. Osyǵan bailanysty departament politsiiamen birlesip, quqyqbuzýshylyq pen qylmystyń aldyn alý sharalaryn kúsheitip jatyr.
Aita keteiik, 2025 jyldyń naýryzynda Mańǵystaý oblystyq memlekettik kirister departamentiniń qyzmetkeri qumar oiynǵa qatysqany úshin jumystan bosatylǵan. Al qyrkúiekte Jańaózen qalalyq kirister basqarmasynyń qyzmetkeri tapqan tabysyn túgeldei báske tikkeni anyqtalyp, qyzmetinen shettetildi.
Budan bólek, Mańǵystaý oblysy politsiia departamenti men oblys ákimdiginiń qoldaýymen Munaily aýdanynda esirtki qylmysyna qatysy bar degen kúdikpen úsh turǵyn ustaldy. Olardyń arasynda aýdan ákiminiń orynbasary men Atameken aýyly ákiminiń orynbasary bar.
