«Kalamkas-Khazar Operating» JSHS bas dırektory Qurmanǵazy Esqazıevtiń aıtýynsha, kompanıa Kaspıı teńiziniń qazaqstandyq sektoryndaǵy ken ornyn ıgerýdi josparlap otyr.
Munaıdyń alǵashqy barreli 2028 jyly óndiriledi. Teńiz platformasyndaǵy qurylys jumystary 2024 jyldyń sońynda bastalady dep josparlanǵan. Al jobalaý jumystary 2023 jyly júrgiziledi.
– 6 aqpanda ken ornyn ıgerý boıynsha jetildirilgen úlgilik kelisimshartqa qol qoıyldy. Joba aıasynda 6 mıllıard dollar tikeleı ınvestısıa tartylady. Jobanyń bastapqy kezeńinde eki myń jańa jumys orny ashylady. Óndiris 2028 jyly bastalyp, jylyna 4 mln tonna munaı óndirý josparlanyp otyr, - dedi Qurmanǵazy Esqazıev.
Oblys ákimi Nurlan Noǵaev bul aýqymdy joba Mańǵystaýdyń ǵana emes, elimizdiń ekonomıkalyq áleýetin arttyratynyn atap ótti.
– Memleket basshysy Qasym-Jomart Toqaev atap ótkendeı, biz munaı salasyndaǵy kompanıalarymyzdyń úlken tájirıbesin paıdalanyp, jańa bastamalardy qoldaýymyz kerek. Bul biz úshin úlken múmkindik jáne jaýapkershilik. Joba álemdik standarttarǵa saı mamandar daıarlaýǵa, jańa jumys oryndaryn ashýǵa jol ashady. Óńirdiń áleýmettik-ekonomıkalyq damýyna qolaıly mýltıplıkatıvtik áser beredi. Bul rette munaı kompanıalary teńiz florasy men faýnasyna zıan keltirmeýge basa nazar aýdarýy kerek, – dedi Nurlan Noǵaev.
QMG-nyń sheteldik strategıalyq seriktesi - reseılik «Lýkoıl» munaı kompanıasy. Qurmanǵazy Esqazıev atap ótkendeı, kómirsýtek shıkizatyn óndirýge arnalǵan keshendi jobalar boıynsha jetildirilgen Úlgilik kelisimshartty ázirleýge qol jetkizdik.
– «Kalamkas-Khazar Operating» JSHS kompanıasy bıyl «Qalamqas-teńiz»jáne «Hazar» ken oryndaryn ıgerý úshin arnaıy quryldy. Prezıdent tapsyrmasynyń arqasynda jetildirilgen úlgilik kelisimshartqa qol qoıyldy. Jaǵalaýdan 64 km qashyqtyqta «Qalamqas teńiz» qurylymynda temir konstrýksıalardan teńiz platformalaryn salý josparlanýda. «Qalamqas teńiz» jáne «Hazar» qurylymdaryndaǵy ýchaskede jalpy qory 81 mln tonna munaı bar. Sonymen qatar Aqtaýda keńse ashýdy josparlap otyrmyz. Aldaǵy ýaqytta Kaspıı teńiziniń qurlyqtaǵy bóliginde de jumystar júrgiziledi, - deıdi Qurmanǵazy Esqazıev.
