Búgin tańerteń Mańǵystaý oblysynyń tasjolynda jol apaty bolyp, saldarynan alty adam kóz jumdy, dep habarlaıdy Dalanews.kz
Mańǵystaý oblystyq PD málimetinshe, qaıtys bolǵandardyń barlyǵy Ózbekstan azamattary. Olar Reseıden kele jatqan.
"16 qazan kúni saǵat 7:30-da Beıneý-Tájen tasjolynda Jac avtokóliginiń qatysýymen jol apaty boldy. Kólik shekaradan ótý úshin kezekte turǵan MAN júk kóligimen soqtyǵysqan. Barlyǵy kólikte 10 adam bolǵan. Solardyń tórteýi Beıneý aýdandyq aýrýhanasyna jetkizilgen. Olardyń jaǵdaıy ortasha aýyr. Barlyq medısınalyq kómek kórsetilýde. Oqıǵa ornynda alty adam qaıtys boldy", - delingen málimette.
Atalǵan fakti boıynsha sotqa deıingi tergeý bastaldy.
