Qazaqstan Respýblikasynyń grek-rim, erkin jáne áielder kúresi federatsiiasynyń jalpy jinalysy ótip, onda salanyń aldaǵy jyldarǵa arnalǵan strategiialyq baǵyttary men júieli damý tetikteri talqylandy, dep habarlaidy Dalanews.kz.
Jinalys barysynda federatsiia basshylyǵy jańa mamandarmen tolyqty. Vitse-prezident laýazymyna Atlanta Olimpiadasynyń jeńimpazy Iýrii Melnichenko men London Olimpiadasynyń júldegeri Aqjúrek Tańatarov taǵaiyndaldy. Sonymen qatar, bas hatshy qyzmetine buǵan deiin «Qazaq kúresi» qaýymdastyǵynyń bas direktory bolǵan maman kiristi.
Al burynǵy quramda jumys istep kelgen vitse-prezidentter Nurjan Qataev, Dáýren Jabasov jáne Sabyrjan Zainidinov óz qyzmetterin jalǵastyratyny belgili boldy.
Otyrysta erkin jáne áielder kúresinen ulttyq quramalardyń bas jattyqtyrýshysy laýazymyna úmitker kandidatýralar da qaraldy. Úmitkerler ózderiniń damý baǵdarlamalaryn tanystyrdy. Nátijesinde, erkin kúresten ulttyq quramanyń bas jattyqtyrýshysy qyzmetine Aslan Baigýlovtyń, al áielder kúresinen ulttyq quramanyń bas jattyqtyrýshysy qyzmetine Ádilet Ermakovtyń kandidatýralary usynylyp, jan-jaqty talqylandy.
Kezdesý barysynda federatsiianyń basty qundylyǵy – kúres sportyn birge damytyp kele jatqan birtutas qaýym ekeni atap ótildi. Federatsiia jumysy jeke bastamalarǵa emes, komandalyq qaǵidatqa súiene otyryp júzege asyrylatyny aityldy. Memleket deńgeiindegi basymdyqtarǵa sáikes salany damytýdyń negizgi baǵyttary aiqyndaldy.
Federatsiia prezidenti Erkin Oqasov sheshim qabyldaý mádenietine erekshe mán beriletinin atap ótti.
«Aldaǵy mindet – kúres sportyn júieli, ádil jáne turaqty damytý. Ár óńirdegi jumys ortaq talaptarǵa súienip, qabyldanatyn sheshimder ashyq ári túsinikti bolýy shart», – dedi ol.
