Keiingi aptada elimizdiń birqatar óńirinde, sonyń ishinde Almaty qalasynda mektepterdiń Kundelik.kz platformasynan BilimClass júiesine jappai kóshýi ata-analardyń narazylyǵyn kúsheitti. Oqý jylynyń qaq ortasynda engizilgen bul ózgeris qoǵamda nege daý týdyrdy? Máseleniń mán-jaiyn Dalanews.kz redaktsiiasy saralap kórdi.
Ákimdik ne deidi?
Almaty qalasynyń Bilim basqarmasy mektepterdiń BilimClass júiesine kóshýi josparly ári jan-jaqty taldaýdan keiin qabyldanǵan sheshim ekenin málimdedi.
Aitýlarynsha, 2025–2026 oqý jylynyń úshinshi toqsanynda mektepter tolyqtai BilimClass elektrondy jýrnalyna ótedi.
Resmi habarlamada atalǵan platforma qazaqstandyq ázirleme ekeni, serverleriniń Qazaqstan aýmaǵynda ornalasqany jáne derekter qaýipsizdigine kepildik beretini aitylǵan.
Sondai-aq olar bul sheshimge deiin BilimClass júiesiniń qaýipsizdigi men tiimdiligine aldyn ala taldaý júrgizilgenin jetkizdi. Atap aitqanda, platforma megapolistegi 15 mektepte pilottyq rejimde synaqtan ótken.
“Pilottyq aprobatsiia nátijeleri BilimClass júiesiniń barlyq qajetti talaptarǵa sai ekenin kórsetti. Platforma paidalanýshylardyń derekteriniń qaýipsizdigi men qupiialylyǵyn qamtamasyz etedi, serverleri Qazaqstan aýmaǵynda ornalasqan jáne el zańnamasyna tolyq sáikes keledi”, – dep málimdedi Bilim basqarmasy.
Sonymen qatar basqarma ókilderiniń aitýynsha, kóshý protsesi oqý úderisine keri áser etpeýi úshin arnaiy josparlanǵan. Osyǵan bailanysty muǵalimder jańa platformamen jumys isteý boiynsha tegin oqytýdan ótken, al tehnikalyq qoldaý qyzmeti mektepterdi turaqty túrde súiemeldep otyr.
BilimClass qandai platforma?
BilimClass tek elektrondy jýrnalmen shektelmeidi. Vedomstvo málimetinshe, platforma mektepti ákimshilendirý júiesin, oqý kontentin, ádistemelik taldaý men analitikany qamtityn keshendi tsifrlyq sheshim. Qazirgi tańda bul júieni Qazaqstannyń 11 óńirinde 2,5 million oqýshy men 350 myń muǵalim paidalanyp otyr.
"Platformany iske asyrýmen Bilim Group IT-holdingi ainalysady", - dedi olar.
Bilim basqarmasynyń málimetinshe, ata-analar men oqýshylar BilimClass-tyń tegin mobildi qosymshasy arqyly sabaq kestesin, qatysý kórsetkishin, oqý úlgerimin jáne úi tapsyrmalaryn baqylaýǵa múmkindik alady. Al pedagogter úshin kúntizbelik-taqyryptyq josparlaý, qashyqtan sabaq ótkizý, interaktivti tapsyrmalar, BJB/TJB katalogy, chat pen keri bailanys quraldary qarastyrylǵan.
“BilimClass júiesine kóshý qysqy demalys kezeńine josparlandy. Bul oqý protsesiniń úzdiksizdigin saqtaýǵa múmkindik beredi”, – dep túiindedi Almaty qalasynyń Bilim basqarmasy.
Ata-analar nege alańdaýly?
Ata-analar oqý jyly aiaqtalmai jatyp tsifrlyq platformany aýysstyrý oqý protsesiniń turaqtylyǵyna keri áser etýi múmkin dep qaýiptenedi. Osyǵan bailanysty olar epetition.kz saitynda arnaiy petitsiia jariialap, qabyldanǵan sheshimge qarsylyq bildirgen. Petitsiia avtorlarynyń aitýynsha, mundai ózgeris muǵalimderdiń jumysyn qiyndatyp, oqýshylardyń psihologiialyq jai-kúiine de salmaq salýy múmkin.
Sonymen qatar qoǵamda oqýshylar men pedagogtardyń jeke derekteriniń qaýipsizdigine qatysty suraqtar da kóterildi. Kundelik.kz ókilderi Almatydaǵy birqatar mekteptiń derekteri paidalanýshylardyń kelisiminsiz basqa platformaǵa kóshirilgenin málimdegen.
Muǵalim pikiri
Dalanews.kz redaktsiiasyna pikir bildirgen muǵalimderdiń biri oqý jyly barysynda LMS júiesin aýystyrý pedagogter úshin artyq júkteme ekenin jetkizdi. Onyń sózinshe, jańa platformaǵa beiimdelý ýaqyt pen qosymsha kúshti talap etedi. Sebebi burynǵy júiede jasalǵan jumystardy qaita kóshirý, jańa interfeiske úirený, oqý josparlary men baǵalardy qaita engizý qajet.
“Oqý jylynyń ortasynda LMS aýystyrý óte yńǵaisyz. Jumysty qaitadan kóshirý ýaqyt alady. Tanys emes platformaǵa aldymen beiimdelý kerek, josparlar men baǵalardy qaita qoiýǵa týra keledi”, – deidi ol.
Muǵalim aldymen Kundelik.kz platformasynyń artyqshylyqtaryna toqtaldy. Onyń sózinshe, Kundelik.kz platformasynda barlyq oqýshy men ata-ana týraly málimet bir bazaǵa jinaqtalǵan. Júiege login men parol arqyly kirip, basqa synyptardyń kúntizbelik-taqyryptyq jospary (KTP), qysqa merzimdi josparlary (QMJ) siiaqty qajetti qujattaryn júktep alýǵa múmkindik bar.
“Kundelik.kz platformasynda tabel shyǵarý, baǵalardy moderatsiialaý siiaqty muǵalimderge qolaily fýnktsiialar bar. Kópshilik úshin bul júie jumys protsesiniń ajyramas bóligine ainalyp úlgerdi”, – deidi ol.
Muǵalim osy qalyptasqan júieden oqý jylynyń ortasynda bas tartý pedagogterge qosymsha qiyndyq týǵyzǵanyn atap ótti. Sondai-aq ol atalǵan platforma Oqý-aǵartý ministrligi tarapynan qoldaýǵa ie ekenin jáne mektepterdiń osy talapqa sai kóship jatqanyn da joqqa shyǵarmady.
Alaida ustaz BilimClass júiesinde keibir fýnktsiialardyń áli de jetildirýdi qajet etetinin jetkizdi. Atap aitqanda, basqa synyptar men muǵalimderden material kóshirý múmkindigi qarastyrylmaǵan, sondai-aq QMJ tirkeý talaby joq.
Ustaz buǵan deiin jekemenshik mektepterde qoldanylǵan Egupage platformasyn da mysalǵa keltirdi. Onyń aitýynsha, bul júie ata-anamen bailanys ornatý, ujymǵa habarlama jiberý, sabaq almastyrý siiaqty tiimdi múmkindikterimen erekshelengenimen, keiin ruqsat etilgen platformalar tiziminen alynyp tastalǵan.
“BilimClass bul platformalarmen salystyrǵanda áli de jetildirýdi qajet etedi. Degenmen ýaqyt óte kele kemshilikteri túzetiledi dep úmittenemiz”, – dep qorytyndylady muǵalim.
