Jaqynda Ilham Áliev Ońtústik Kavkazdy turaqty aimaqqa ainaldyrý qajettigin aitqan bolatyn. Saiasattanýshy, «Atlas» saiasi zertteýler ortalyǵynyń basshysy Elhan Shahinoglý Álievtiń bul málimdemesine qatysty pikir bildirdi, dep habarlaidy Dalanews.kz.
Ázerbaijan prezidenti Ilham Áliev III Shýsha jahandyq mediaforýmynda Ońtústik Kavkazdy turaqty aimaqqa ainaldyrý qajettigin jetkizdi.
«Bizge turaqtylyq pen qaýipsizdik kerek. Ońtústik Kavkaz ǵasyrlar boiy qaqtyǵys pen qan tógilgen, halyqtary kóp azap shekken aimaq boldy. Endi munyń bári artta qalýy tiis», – dedi Áliev.
Prezidenttiń osy sózine bailanysty saiasattanýshy Elhan Shahinoglý pikir bildirdi.
«Ázerbaijan, rasynda, beibit ómir súrgisi keledi. Biraq Kremldiń Ońtústik Kavkazdyń turaqtylyǵy men tynyshtyǵyn qalaýy kúmándi. Resei biligi buǵan deiingi qiratýshy saiasatyn jalǵastyryp otyr. Búgingi basty suraq: Kreml Ázerbaijanǵa qarsy endi ne oilastyryp jatyr? Reseidiń ártúrli qalalarynda turatyn ázerbaijandardyń jaǵdaiy qiyndaýy yqtimal. Buǵan deiin bolǵandai, aýyl sharýashylyq ónimderimizdi keri qaitarý áreketteri de jalǵasýy múmkin. Ýkrainaǵa qarsy soǵys ashqaly beri Reseidiń memlekettik arnalary, shaqyrylatyn sarapshylary men Z-blogerler Ázerbaijanǵa qarsy arandatýdy kúsheitýge shaqyryp júr», – deidi sarapshy.
«Bul bizdi alańdatýy tiis pe?» degen saýalǵa saiasattanýshy:
«Eger reseilik áskeriler Qarabaqta «bitimgerler» degen atpen áli kúnge deiin júrgen bolsa, alańdaýǵa negiz bolar edi. Biraq biz bul máseleni sheshtik: 200 jylda alǵash ret jerimizde Resei áskerleri joq. Degenmen soltústikten túrli arandatýlarǵa daiyn bolýymyz kerek», – dep jaýap berdi.
Shahinoglýdyń pikirinshe, Ázerbaijan eki baǵytta saqtyq sharalaryn qolǵa alýy tiis.
«Birinshiden, aýylsharýashylyq ónimderimizdi satýǵa balama naryqtardy tezirek izdep tabýymyz qajet. Ekinshiden, Reseidegi ázerbaijandardyń elge oralýyna jaǵdai jasaý kerek. Olarǵa Qarabaq pen Shyǵys Zangezýrda biznes ashýǵa múmkindik berip, jeńildetilgen nesie berýge bolady. Sebebi Kreml Grýziiamen soǵys kezindegi tájiribesin bizge qarsy qoldanýy yqtimal. Iaǵni, Reseidegi ázerbaijan kásipkerleriniń kapitalyn «salyqtyq tekseris» jeleýimen tárkileýi múmkin», – deidi saiasattanýshy.
Onyń aitýynsha, Resei men Iran Kaspii teńizinde birlesken áskeri jattyǵýlar ótkizýdi josparlap otyr, bul Ázerbaijannyń teńiz shekaralaryna qaýip tóndirýi múmkin.
«Sonymen qatar, Resei Daǵystanmen shekaralas aimaqqa qosymsha kúshter shoǵyrlandyrýy yqtimal. Buǵan jaýap retinde Ázerbaijan Túrkiia jáne Ortalyq Aziiadaǵy túrkitildes eldermen áskeri jattyǵýlar sanyn kóbeitýge kúsh salýy kerek», – deidi sarapshy.
Saiasattanýshy qorytyndylai kele:
«Logikaǵa salsaq, Kreml Ázerbaijanmen qarym-qatynasyn ýshyqtyrmaýǵa tyrysýy kerek edi. Óitkeni ótken jyldyń jeltoqsanyna deiin eki eldiń qarym-qatynasy qalypty bolatyn. Alaida Kremldiń sheshimderinen logika izdeýdiń ózi qiyn», – dep túiindedi Elhan Shahinoglý.
