Saltanat qaitys bolǵan túni Bishimbaev sóilesken kóripkel sotta kýálik etti. Ol sol túni tek Bishimbaevpen ǵana emes, onyń anasymen de sóileskenin aitty, - dep habarlaidy Dalanews.kz.
"Men Bishimbaevtyń anasyna habarlasyp balań birdeńe búldirip qoidy, baryp bil" dedim. Bul Bishimbaevpen sóileskennen keiin bolǵan jaǵdai. Ol qatty jylai bastady, men tutqany qoia saldym. (...) Qiyn jaǵdai boldy, olar bir-birin óltirip qoiardai tóbelesti" dep aittym ”, – dedi tarolog.
Sonymen qatar, kóripkel úsh kúnnen beri áldebireýler habarlasyp, túrli nárse aityp jatqanyn aitty. Tarolog endi politsiiaǵa júginbek.
Qorǵaýshy Nazym Qusaiynova Bishimbaev habarlasqannan keiin karta ashtyńyz ba degen suraq qoidy.
- Joq.
- Onda nege “bári jaqsy, Saltanat tańǵa deiin uiyqtaidy” dep aittyńyz? Nege shatastyryp jatsyz?
- Men solai sezdim.
- Bishimbaevtyń anasyna nege habarlastyńyz?
- Men solai sezdim.
Kýágerden jaýap alý kezinde aiyptalýshylardyń biri Baijanov "kóripkel-tarolog ótirik aityp jatyr" dep málimdedi. Onyń sózinshe, tarolog jedel-járdem shaqyryńyz dep aitpaǵan.
Eske salaiyq, burynǵy ulttyq ekonomika ministri Qýandyq Bishimbaevqa qatysty sot otyrysynda shymkenttik kóripkel kýálik etti.
Prokýror Aijan Aimaǵanova kóripkel jeke derekterin jariia etkisi kelmeitinin aityp, sot otyrysy barysynda sýdiadan onyń tek daýysy estilýine jaǵdai jasalýyn surady. Kóripkel ózine qysym jasalyp jatqanyn málimdegen.
Sot otyrysy barysynda kóripkel Bishimbaevty 1,5-2 jyldan beri anasy arqyly biletinin aitty.
"Eki aida bir ret qońyraý shalyp, jumysy, kásibi týraly suraityn. Men tarologpyn, ol birdeńe bilgisi kelse, "qarap kórińizshi" dep júginetin", - dedi ol.
Sonymen qatar, kóripkel marqum Saltanat Núkenova qaitys bolǵan kún týraly baiandap berdi.
"Ol habarlasty. Naqty ýaqyty esimde joq. Meniń qolym bos emes edi. Biraq tutqany kóterdim. Ol "Saltanat ekeýmiz qatty mas bolyp, tóbelestik" dedi. Bul shamamen tústen keiingi ýaqyt edi. 15.00-16.00 edi. Onyń ishimdik ishkeni baiqalyp turdy. Qatty mán bermedim. Ol "qarap berińizshi" dedi. Men "dárigerge habarlas, jedel járdem shaqyr" dedim. Ol "qaita-qaita qarap kórińizshi" dedi. Óte qysqa áńgime boldy. 30 sekýndtai. ..."Keshe qatty iship, qatty tóbelestik" dedi. "Men ne isteiin?" dedim. Daýysy kúndegidei emes edi, ár sózin tańdap aitty. Men "jedel járdemge habarlas" dedim", - deidi kýáger.
Kóripkeldiń sózinshe, Bishimbaev Saltanattyń uiyqtap jatqanyn, qoryldap jatqanyn aitqan. Sondai-aq, qozǵalmaitynyn, turmaitynyn, eshteńe iship-jemegenin jetkizgen.
Odan bólek kýáger Bishimbaev jeke qarym-qatynasyna qatysty máselede, otbasylyq taqyryptarda psiholog kómegine júgingenin aitty. "Óte ádemi ekenin, ony súietinin aitty (Bishimbaev Núkenova týraly - esk.)", - dedi ol.
Kóripkel jaýap berý kezinde Bishimbaevpen sóileskende birneshe ret "jedel járdemge habarlas" dep keńes bergenin qaitalady.
