Mádeniet jáne aqparat ministri Aida Balaeva Dúniejúzilik teatr kúnimen quttyqtady, dep habarlaidy Dalanews.kz.
Ministrdiń aitýynsha, elimizde búginde 70 teatr qyzmet etedi, sonyń 57-si – memlekettik. Olardyń 11-i respýblikalyq, 46-sy óńirlik deńgeide jumys isteidi. Sońǵy tórt jylda Qazaqstanda jańadan bes memlekettik teatr ashylǵany – otandyq teatr óneriniń damý ústinde ekenin dáleldeidi.
«Bizdiń teatrlar kórermendi jańa qoiylymdarmen ǵana qýantyp qoimai, elimizdiń mádenietin álem sahnalarynda da nasihattap júr. 9 myńǵa jýyq maman eńbek etetin teatr ujymdarynda 4 200-den astam adam tikelei shyǵarmashylyqpen ainalysady. Memlekettik teatrlar jylyna 200-den astam jańa spektakl qoisa, sonyń 107-si – otandyq avtorlardyń týyndylary», – dep atap ótti ministr.
Sonymen qatar Aida Balaeva teatr sahnasy men onyń artyndaǵy barsha sala mamandaryn – akterler, rejisserler, dramatýrgter, stsenograftar, jaryq pen dybys sheberleri, kostiýmerler, grimerler, ákimshilik jáne tehnikalyq qyzmetkerlerdi aitýly merekemen quttyqtai otyryp, olarǵa shyǵarmashylyq shabyt pen biik jetistikter tiledi. Ol, ásirese, teatrdyń ómirsheńdigin aiqyndaityn eń basty faktor – kórermenderdiń ystyq yqylasy men shynaiy qoldaý ekenin tilge tiek etti.
«Sahnada jańa tarihtar jasalyp, zalda shapalaqtyń úni óshpegende, teatr adamdardy ónermen áldilep, tánti ete beredi. Dúniejúzilik teatr kúni qutty bolsyn!» – dedi Aida Balaeva.
