El aýmaǵyndaǵy Halyqqa qyzmet kórsetý ortalyqtary (HQO) qujat qabyldaýdy 27 qarasha kúni bastady. Bul is jeltoqsan aiynyń sońyna deiin jalǵasady. 2020 jylǵa deiin qujat tapsyryp úlgermegen kópbalaly analar bul isti qańtar aiynda da tyndyra alady. Degenmen qujatty 2020 jylǵa deiin tapsyrǵan durys, dep habarlaidy Dalanews.kz inbusiness.kz-ke silteme jasap.
2018-2019 jyldary kópbalaly ana atanǵan áielder HQO-ǵa bankten nemese "Qazposhta" AQ-dan shot ashqany jáne jasy 23-ten aspaǵan balasy kúndizgi oqý bóliminde oqityny týraly anyqtamany (stýdet balasy bar analar), neke kýáligin, bank kartochkasynyń 20 sandy nomerin, sondai-aq balalarynyń týý týraly kýáliginiń kóshirmesin ótkizýi kerek. Atap kórseterligi anasy men balalary bir úide tirkelgen bolýy mańyzdy jáne HQO-ǵa qujattardy kópbalaly otbasynyń ákesi emes, anasy tapsyrýy tiis.
Otbasy músheleri bir mekenjaida tirkelmegen jáne birge turmaityn bolsa, járdemaqy berilmeidi. Osynyń aldyn alý úshin kópbalaly otbasy HQO-ǵa kelip, bir mekenjaiǵa tirkelýi kerek.
2018 jylǵa deiin kópbalaly analardyń sanatyna qosylǵan jáne kúni búginge deiin 10 500 teńge kóleminde memlekettik járdemaqy alyp kelgen analarǵa mundai talap qoiylmaidy.
Olardyń barlyǵyna memleket 2020 jyldyń 1 qańtarynan bastap kópbalaly otbasynyń tabysyna qaramai tólenetin járdemaqyny avtomatty túrde taǵaiyndaidy.
2018-2019 jyldary kópbalaly ana atanǵan áielderge HQO-ǵa qujat tapsyrý týraly talap beker qoiylyp otyrǵan joq. Munyń birneshe sebebi bar. Birinshiden, 2018 jyly tórt balasy bolǵan kelinshekterden kópbalaly ana degen mártebe alynyp tastaldy. Ekinshi, 2018 jyldan beri qarai 4 bala týǵan analarǵa 10 500 teńge kóleminde memlekettik járdemaqy taǵaiyndalǵan joq. Úshinshi, 2018 jyly tórt balasy bolǵan áielder memlekettik derekter bazasyna kópbalaly ana retinde engizilmedi. Joǵarydaǵy talap osy olqylyqtardyń ornyn toltyrý jáne 2020 jyldyń 1 qańtarynan bastap 4 jáne odan kóp balasy bar analarǵa memlekettik járdemaqy taǵaiyndaý úshin qajet boldy.
Eńbek jáne halyqty áleýmettik qorǵaý ministri Birjan Nurymbetovtyń málimdeýinshe, kópbalaly otbasylarǵa beriletin memlekettik járdemaqyny ataýly áleýmettik kómekpen shatastyrmaý kerek.
"2020 jyldyń 1 qańtarynan bastap barlyq kópbalaly otbasyǵa tabysyna qaramai memlekettik járdemaqy beriledi. Ol bala sanyna bailanysty taǵaiyndalady. Mysaly, 4 balasy bar otbasylarǵa – 42 500 teńge, 5 balaǵa – 53 125 teńge, 6 balaǵa – 63 750 teńge, 7 jáne odan da kóp balasy barlarǵa – 74 375 teńge tólenedi. Memlekettik járdemaqy tabysy joǵary jáne tómen kópbalaly otbasylarǵa birdei beriledi. Burynǵydai tabysy joǵary kópbalaly otbasylar memlekettik járdemaqy almaidy degen talap bolmaidy. Al ataýly áleýmettik kómek turmysy tómen otbasylarǵa beriledi. Ataýly áleýmettik kómek bala sanyna bailanysty taǵaiyndalmaidy. Memlekettik qoldaýdyń bul túri kómekke muqtaj adamdarǵa usynylady", – dedi ministr.
Aita keteiik, bas shaharda turatyn, 2018-2019 jyldary kópbalaly ana atanǵan áielder memlekettik járdemaqy alý úshin tapsyrylatyn qujattardy HQO-ǵa, "Januia" otbasyn qoldaý ortalyǵyna jáne aýdan ákimdikteriniń apparattaryna ótkize alady.
Nur-Sultan qalasynda qujat qabyldaý 3 jeltoqsan kúni bastaldy. Qujat Beibitshilik kóshesi, 14 mekenjaiynda ornalasqan "Januia" otbasyn qoldaý ortalyǵynda, aýdandyq ákimdikterde jáne HQO-larda qabyldanyp jatyr.
