Nur-Sultan qalasynyń ákimdigi kópshiliktiń kóńilin alań qylǵan ózekti máseleniń ara-jigin ashyp, Taldykóldiń taǵdyryna qatysty resmi túsinikteme berdi dep habarlaidy Dalanews.kz.
Elordanyń sáýlet, qala qurylysy jáne jer qatynastary departamentiniń basshysy Nurlan Uranhaev Taldykóldi sóz etkende kópshilik bul jerdi Kishi Taldykólmen jii shatastyratynyn qaperge saldy.
“Qalanyń sáýlet strategiiasyna sáikes Taldykóldi qýalai kópqabatty turǵyn úi boi kóteredi. Álbette, turǵyn úi salynǵan jerde mektep pen balabaqsha, aýrýhana jáne halyqqa qajetti ózge de áleýmettik nysandardyń turǵyzylýy zańdy.
Kóldiń taǵdyryna alańdap jatqan qaýymǵa aitarym, kóldiń ózine tiispeimiz. Kerisinshe, onyń janyna úi salyp, sol mańaidaǵy infraqurylymdy jetildiremiz.
Keibir tabiǵat janashyrlary sor batpaqty las sýdy tazartýdy kóldi qurtý dep túsinetin sekildi. Qaitalap aitqanym artyq bolmas, kóldi joiyp jiberýdi kózdemeimiz. Qaita ony las batpaqtan arshyp, saqtap qalmaqshymyz. Ekologiia talaptary boiynsha onyń batpaǵy las ári ziian”, – dedi Uranhaev elorda ákimdiginde ótken baspasóz máslihatynda.
...
Ázir Kishi Taldykóldi ziiandy zattardan tazartý maqsatynda daiyndyq jumysy júrip jatyr.
Qoǵam belsendisi, ekolog Azamathan Ámirtaidyń aitýynda, Kishi Taldykól - áýelden batpaqty jer. Keńes úkimeti kezinde bul araǵa káriz qaldyqtaryn tastaǵan.
“Bul másele maman kózimen qarar bolsam, qalanyń aýmaǵynda nemese oǵan jaqyn mańda qolqany qabatyn jaǵymsyz iisi bar nysan bolmaýy qajet. Buǵan qatysty BUU-nyń arnaiy standarty qabyldanǵan.
Al Nur-Sultan qalasynyń ákimdigi kóldi saqtap qalýdyń amal-sharasyn jasap jatyr. Tiisinshe, turǵyn úidi turǵyzatyn kompaniiaǵa kóldiń tabanyn tazartyp, saqtap qalý talabyn qoiyp otyr. Osy arada aýmaǵy 20 gektarǵa jetip jyǵylatyn jasandy bassein paida bolady. Budan syrt saiabaq salamyz dep otyr.
Eger ákimdiktiń sózi men isi sáikesip, kól tazartylyp, saqtalyp, mundaǵy infraqurylym túzelse, bul osy kóldiń keleshegi úshin kúresken ekologtardyń jeńisi bolar edi”, – dedi osy oraida Azamathan Ámirtai.
