Jalpy jaýapty memlekettik qyzmette otyrǵan adamnyń bulaisha aqtalýy qanshalyqty oryndy?
Ras, qazir memlekettik kompaniialarda kezinde... bizneste tabysty jumys istep, búginde óziniń is-tájiribesin memlekettik qyzmette «synap» júrgen menedjerlerden aiaq alyp júre almaisyz.
Bizdiń bilýimizshe, bizneste tabysty jumys istegen adamdar dál qazirgi ýaqytta «at basyndai altyn berem memlekettik qyzmetke bar» deseńde barmaidy.
Aitalyq, 90 jyldary biznesti dóńgeletip, milliard dollar tapqan Marǵulan Seisembai nege ministr bolýǵa, «Samuryq – Qazynaǵa» qarasty kóp kompaniialardyń birin basqarýǵa nege umytylmaidy? Kerek deseńiz, Seisembai Prezidenttiń janyndaǵy Ulttyq senim keńesine múshesi bolýdan bas tartqanyn bilemiz.
Sol siiaqty «Astana Motors» kompaniiasynyń negizin qalaǵan Nurlan Smaǵulov nege minsitr bolýdy armandamaidy?
Sol siiaqty qurylys salasynda aty shyqqan Aidyn Rahymbaev pen media salasynyń jiligin shaǵyp maiyn ishken Armanjan Baitasovtyń ministr bolyp, memlekettik kompaniiany basqarýǵa qabileti jetpei ma? Jetedi. Jetkende qandai?
Bulardy naǵyz kásipkerler. Smaǵulov deseńiz «Astana Motors», Seisembai deseńiz «Alians bank», Rahymbaev aýyzǵa alsańyz «BI Group» komapniiasy ózdiginen til ushyna orala ketedi.
Bul azamattar «kásipkermin, áielime million dollarǵa kólik alyp berdim» dese eshkim olarǵa qarsy daý aitpaidy. Óitkeni olarǵa halyq senedi. Al Aibatyr Jumaǵulovtyń «kezinde kásipkerlikpen ainalystym, 12 kólikti sol kezde aýystyryp aldym» degen sózine eshkim de sengen joq. Onyń bul sózi qaita jurttyń ashýyn týǵyzǵany anyq.
Iá, Aibatyr Jumaǵulov elimizdegi irgeli kommertsiialyq bankte jáne «Baýyr Qazaqstan» degen kompaniialardy jaýapty qyzmetter atqarǵany belgili. Aitpaqshy, Jumaǵulovtyń bizneste tabysty jumys istegen jyldary «Bank TsentrKredit» bankinde qyzmet etken jyldarymen tuspa-tus keledi eken.
Iá, bankte ózine tapsyrylǵan jumystardy tabysty atqaryp, bank qojaiyndarynyń kóńilinen shyqqan shyǵar (muny endi biznes salasynda tabysty jumys istedim dep aitýǵa bola ma?).
Sóz joq, Jumaǵulov «bilikti ekonomist, mamanmyn» dep aitýǵa quqy bar. Biraq kezinde biznespen tabysty ainalysyp, qomaqty qor jinadym dep aitýy artyqtaý.
Iá, qazir memlekettik kompaniialarǵa iri qarjylyq toptarǵa jaqyn júretin qarjyger, ekonomister kelip jatyr. Olardy bilikti biznesmen dep aitý artyq. Sol sebepti olar jaza basqanda «buryn biznespen ainalysqanda alǵan dúnie-múlkim» degen sózderine halyq senbeidi. Al buǵan halyqtyń senbeýge qaqysy bar.
Jarbol KENTULY
