Bas prokýror Berik Asylov Májilis depýtattarynyń qarjylyq pıramıdalarǵa qatysty saýalyna jaýap berdi, – dep habarlaıdy Dalanews.kz.

"Bıyl qarjy pıramıdasyn qurý jáne oǵan basshylyq etý derekteri boıynsha qylmystyq isterdi tirkeý eki eseden asa óskeni baıqalady (27-den 62-ge deıin), bul quqyq qorǵaý organdarynyń olardy anyqtaý jónindegi jumysty aıtarlyqtaı jandandyrǵanyn kórsetedi.

Sońǵy bes jylda pıramıda qurbandarynyń sany jeti esege azaıdy, eger 2020 jyly 3575 bolsa, 2024 jyly 522 boldy», - dep málimdedi Berik Asylov.

Onyń aıtýynsha, 2024 jyly qazanda «Qarjylyq (ınvestısıalyq) pıramıda belgilerin bekitý týraly» birlesken buıryqqa qol qoıylǵan (qatysýshylar – BP, QMA, İİM jáne QNRDA). Ázirlengen belgiler qarjylyq pıramıdalardyń qyzmetin bastapqy kezeńderde anyqtaýǵa jáne jolyn kesýge yqpal etedi.

«Bas prokýratýranyń tapsyrmasy negizinde mundaı ister kompanıalar qarjylyq pıramıdanyń belgilerine jatatyn bolsa, onda aryz túspegenine jáne zardap shekkenderge keltirilgen zıan bolmaýyna qaramaı tirkele bastady. Mysaly, bıyl 4-7 aqpan aralyǵynda «Asar Vaspana» qarjylyq pıramıdasyn qurý jáne oǵan basshylyq etý deregi boıynsha aýmaqtyq qarjylyq monıtorıń bólimsheleri sotqa deıingi 20 tergep-tekserýdi tirkedi», - deıdi Bas prokýror.

Berik Asylov ınternette belsendi jumys júrgizilip jatqanyn, onyń nátıjeleri boıynsha bıyl 1 848 quqyqqa qaıshy materıal anyqtalǵanyn (2024 j. 5 695) jáne 1 458 ınternet resýrsqa qoljetimdilik shektelgenin (2024 j. – 4 662) málimdedi.

"Kıberqadaǵalaý" júıesin paıdalana otyryp, qarjylyq pıramıdalardy jarnamalaıtyn 4,2 myń resýrs (2024 jyly – 14,2 myń) buǵattaldy. Qarjylyq monıtorıń agenttigi «Baiqa, piramida» Telegram-botynda qarjylyq pıramıda belgilerine azamattardyń toǵyz myńnan asa ótinimin qarady", - dep habarlady Asylov.

Sonymen qatar, bıylǵy 12 naýryzda Úkimet Bas prokýratýranyń bastamasymen alaıaqtyq shemalar men qarjylyq pıramıdalarǵa qarsy is-qımyl jónindegi jol kartasyn bekitkenin eske saldy.