Túrkistan oblysy ákimdiginiń qoldaýymen, «Ońtústik» aımaqtyq ınvestısıalyq ortalyǵynda «YASSY BUSINESS» jeńildetilgen nesıe berý baǵdarlamasy aıasynda kásipkerlerdi qarjylandyrýǵa bastaý berildi. Bul - «Kerýen Saraı» týrısik kesheninde bıznes bastaıtyn jeke kásipkerler úshin úlken múmkindik, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Qarjylandyrýdy maksımaldy jeńildikti sharttarmen – jyldyq ósimi 4% - ben júrgizý josparlanýda.

Iaǵnı, jeke kásipkerlerge 27 mln.teńgege deıin 4 paıyzben 5 jylǵa deıin nesıe beriledi. 1 JMK-ǵa qaryzdyń eń kóp somasy 60 aıdan aspaıtyn merzimge 8000 AEK-ten aspaıdy (aınalym qarajatyn tolyqtyrýǵa - 36 aı). Sonymen qatar, kásipkerlerge 12 aıǵa deıin demalys beriledi – negizgi qaryzdy óteý boıynsha jeńildikti kezeń.

Jobany iske asyratyn ne iske asyrýdy josparlaıtyn mıkro jáne shaǵyn kásipkerlik sýbektileri bolý, sondaı-aq ulttyq stıldegi kádesyı ónimderin (qolónershiler, qyshshylar jáne t.b.) óndirýshiler bolý qarjylandyrý úshin qosymsha sharttar bolyp sanalady.

Aıta keteıik, Túrkistanda Ortalyq Azıadaǵy eń iri «Kerýen saraı» týrısik kesheni sáýir aıynda ashyldy. Keshen Túrkistannyń tarıhı ortalyǵynda ornalasqan. Munda zamanaýı qonaq úıler, meıramhanalar, fýd-korttar, saýda ortalyqtary men bazarlar jumys isteıdi.