Kentaý qalasynda 600 azamatqa jaldamaly páter kilti tabystaldy. Onyń ishinde jetim balalarǵa, ata-anasynyń qamqorlyǵynsyz qalǵan balalarǵa – 109 páter, kópbalaly otbasylarǵa – 106 páter, halyqtyń áleýmettik jaǵynan álsiz toptary sanaty boıynsha – 227 páter, memlekettik qyzmetshilerge – 139 páter, avarıalyq  jaǵdaıda dep tanylatyn azamattarǵa 4 páter qaralǵan, – dep habarlaıdy Dalanews.kz Túrkistan oblysy ákiminiń baspasóz qyzmetine silteme jasap.

Jaldamaly baspanamen qamtylǵandardyń qatarynda qala turǵyny Qalampyr Týleýbekova da bar. Ol 2015 jyly kópbalaly otbasylar sanaty boıynsha úı kezegine tirkelgen. Qala turǵyny osy ýaqytqa deıin turǵyn úı kezegin únemi EGOV elektrondyq portaly arqyly baqylap kelipti.

Kópbalaly ana 6 jylǵa jýyq ýaqyt boıy turǵyn úı kezegin sabyr saqtap, shydamdylyq tanytyp kútken. Búginde jaldamaly baspanaǵa qol jetkizgen otbasynyń qýanyshynda shek joq.

Dál osy sekildi qanshama qala turǵyndary kópten kútken turǵyn úılerine qoldary jetip qýanyshqa kenelýde.

«Nur Otan» partıasynyń «Ózgerister joly: Ár azamatqa laıyqty ómir!» atty saılaýaldy baǵdarlamasynda 2025 jylǵa deıin Kentaý qalasynda 3600 otbasyny baspanamen qamtý kózdelgen. Búginde osy Jol kartasy boıynsha jumys júrip jatyr.

Aıta keteıik, qazirgi tańda Kentaý qalasynda 5 qabatty 60 páterli 5 úıdiń qurylysy bastaldy. Oǵan qosa 10 úıdiń qurylysyn salýǵa jobalyq-smetalyq qujattamasy ázirlengen.