Qala ákimi Ábdibaqyt Maqulbaevtyń aitýynsha, budan bylai Kentaýda aýyl sharýashylyǵy óndirispen qatar órkendeitin bolady. Kentaýǵa qosylǵan 12 aýyldyq okrýgte 200 myńǵa tarta turǵyn, 700 myń gektardan asa jer bar ekenin eskersek Kentaý ekonomikasynyń ártaraptanýy túsinikti de.
– Oblystyq ákimdikpen aqyldasa kele Kentaýdyń aýyl sharýashylyǵy salasyna jan bitiretin 62 joba ázirlendi. Osy jobalardyń arasynan ekonomikalyq turǵydan tiimdi degenderi iriktelip alynǵasyn «QR Agroónerkásiptik keshenin damytýdyń 2017-2021 jyldarǵa arnalǵan memlekettik baǵdarlamasy» sheńberinde qarjylai qoldaý jasalyp, sol jobalarǵa qarjylai kómek beriledi. Sonyń nátijesinde biz Kentaýǵa tiip turǵan Túrkistan qalasyn aýyl sharýashylyǵy ónimderimen tolyqtai qamtamasyz etetin múmkindik alamyz, – deidi Ábdibaqyt Maqulbaev.
Ákimniń aityp ótkenindei Kentaýǵa qosylǵan eldi-mekenderdiń ázirgi kúni eń ózekti máselesi – egistik jerdi jetkilikti aǵyn sýmen qamtamasyz etý.
Osy oraida qalalyq ákimdik aýyl sharýashylyǵy qurylymdarynyń ókilderin, sharýa qojalyǵy basshylaryn bir ústeldiń basyna jinap, máseleni sheshýdiń amaldaryn izdestiripti. Osy kezdesý barysynda naqty jospar jasalyp, onyń oryndalý barysy biraýyzdan maquldanǵan. Atalǵan joba júzege asqan jaǵdaida Kentaýǵa qarasty aýyldar sýarý maýsymynda sýdan tapshylyq kórmeitin bolady.
– Sonymen qatar aýyldardy aralaý kezinde anyqtalǵan infraqurylymdardy damytý, áleýmettik nysandardyń jumys isteýi, meditsinalyq qyzmet, transport júiesi, jolaýshylar tasymaly jáne basqa da máseleler merzimine sáikes óz sheshimderin tabatyn bolady, – deidi qala ákimi.
