Áleýmettik jelide Astanada akademiialyq almasý baǵdarlamasymen bilim alyp júrgen eki qyrǵyzstandyq stýdenttiń Kenesary han týraly aitqan sózi qyzý talqyǵa tústi, dep habarlaidy dalanews.kz.
Áńgime barysynda qyzdardyń biri qazaq halqynyń tarihy týraly sóz qozǵaidy.
"Qazaqtar jaqynda ǵana paida boldy, al qyrǵyzdar burynnan bar. Qazaqtar qyrǵyzdarǵa taǵy bir másele boiynsha renjidi. Endi sony sen túsindirshi", – deidi ol ekinshi qyzǵa.
Áńgimege qatysyp otyrǵan er adam sózdiń Kenesary han týraly ekenin naqtylap, hannyń basy nelikten qazaqtarǵa qaitarylmaǵanyn suraidy.
Suraqqa jaýap bergen qyz muny kóshpendilerdiń saltymen túsindirgen.
"Bizdiń saltymyz boiynsha kóshpendiler jaýdyń basyn qaitarmaýy kerek. Hannyń atyn qorlap, ony birjola taptaý úshin bas súieginen sharap ishýimiz kerek", – deidi qyz.
Osy kezde videoǵa qashyqtan qosylǵan taǵy bir er adam qyzdardyń Qazaqstanda júrgen-júrmegenin suraidy. Kadrdaǵy júrgizýshi olardyń Bishkekten Astanaǵa stýdent almasý baǵdarlamasymen kelgenin aitady.
"Olar erteń qazaqstandyq dostary men ata-analarynyń aldynda uialmai ma? Bul video internetke taraidy. Biz qyrǵyzdardy qurmetteimiz, olar týraly jaman sóz aitpaimyz. Al olar qazaqtyń hanyn qorlap otyr", – deidi ol.
Ázirge videodaǵy qyzdardyń aty-jóni, azamattyǵy jáne Astanadaǵy qai oqý ornynda bilim alyp júrgeni belgisiz. Sondai-aq olardyń aitqan sózderine bailanysty resmi organdar tarapynan túsinikteme berilgen joq.
