Memleket basshysy Qasym-Jomart Toqaev Ulttyq quryltaida eltańabaǵa qatysty pikirler eskerýsiz qalmaýy kerek ekenin málimdedi, - dep habarlaidy Dalanews.kz.
"Bizdiń Kók týymyzda min joq. Onda elimizdiń biregei bolmysy naqty beinelengen. Ánuranymyz da naǵyz ulttyq rýhty pash etedi. Qazaqtyń ánurany álemniń ár túkpirinde shyrqalyp júr. Jańa jyldy jaqyndarymyzdyń ortasynda ánuranmen qarsy alý jaqsy dástúrge ainaldy. Bir sózben aitsaq, ánuranymyzdyń sózi de, áýeni de halyqtyń júregine ábden ornyqqan.
Al Eltańbamyzǵa qatysty syni pikirler aitylyp qalady. Ony Keńes zamanyndaǵy Gerbke uqsatyp jatady. Tym eklektikalyq, kúrdeli deidi. Mundai oidy el isine bei-jai qaramaityn belsendi azamattar ǵana emes, mamandar da aityp júr. Oryndy paiymdar eskerýsiz qalmaýy kerek.
Ortaq kelisimge kelgen jaǵdaida arnaýly komissiia qurýǵa bolady. Bul komissiia máseleni jan-jaqty qarastyryp, qoǵamdyq talqylaý ótkizedi. Sosyn Qazaqstannyń jańa Eltańbasynyń jobasyn jasaýǵa ashyq baiqaý jariialanady", - dedi Toqaev.
