Shymkent qalasynyń ákimdigi Keń baba saiabaǵyn memleket menshigine qaitarýda belsendi jumystar atqarýda, dep habarlaidy Dalanews.kz.
Qazir bul másele boiynsha birneshe sot otyrysy ótip, nátijesinde Shymkent qalalyq sotynyń azamattyq ister jónindegi sot alqasynyń 2024 jylǵy 10 shildedegi qaýlysymen birinshi satydaǵy sottyń sheshimi rastalyp, ózgerissiz qaldy.
Degenmen ákimdik tarapynan atqarylatyn jumystar kóp.
Eske salaiyq, 1999 jyly Shymkent qalasy ákiminiń sheshimimen jalpy kólemi 3,9272 ga jer telimi “ChPKF “Sapar” JShS-ne balalar saiabaǵynyń aýmaǵynda balalar men jasóspirimderge estetikalyq jáne mádeni tárbie berý ortalyǵyn uiymdastyrýǵa 15 jylǵa deiin ýaqytsha paidalanýǵa berilgen bolatyn.
Ókinishke qarai, bastapqy joba oryndalmai saiabaq az ýaqytta úlken qoǵamdyq tamaqtaný alańyna ainaldy. Kommertsiialyq paidalaný barysynda ǵasyrlar boiǵy emen aǵashtary kesilip, saiabaqtyń kei aýmaqtary betondalyp, plitkalar tóselip, ýáde etilgen balalar ortalyǵy jasalmady. Tegin oiyn alańdary, átkenshekter men qumsalǵyshtar da qiratyldy.
Ýaqyt óte saiabaqta saýda nysandary kóbeiip, sanitarlyq jaǵdai nasharlap, azamattardyń narazylyǵyn týǵyzdy. Qoǵamdyq pikirdi eskere otyryp, ákimdik saiabaqty memleket menshigine qaitarý protsesin bastady. Sebebi 1999 jyly belgilengen jalǵa berý merzimi áldeqashan aiaqtalǵan bolatyn.
