Jýrnalisterdi qorǵaý komiteti KazTAG agenttigine qatysty qylmystyq iske alańdaýshylyq bildirdi, dep habarlaidy Dalanews.kz
«Jýrnalisterdi qorǵaý komiteti (CPJ) aqparattyq agenttik KazTAG direktory Aset Mataev pen bas redaktor Amir Kasenovke jalǵan aqparat taratty degen aiyp taǵylyp, erteń olarǵa sotqa shaqyrtý qaǵazy beriletinine alańdaýshylyq bildiredi. Bul – belgili jýrnalist Gúlnar Bajkenovanyń dál osyndai aiyp boiynsha qamaýǵa alynǵanynan keiin bir apta ótken soń bolyp otyr. Biz Qazaqstan biligin taǵy da jala jabýdy qylmystyq jaýapkershilikten alyp tastap, mundai isterdi tek azamattyq sot tártibimen qaraýdy qamtamasyz etýge shaqyramyz», – delingen CPJ-diń dúisenbi kúngi málimdemesinde.
Jýrnalisterdi qorǵaý komiteti (CPJ) – jýrnalisterdiń quqyqtaryn qorǵaý jáne álem boiynsha baspasóz erkindigin qamtamasyz etý úshin 1981 jyly amerikalyq tilshiler toby qurǵan táýelsiz, kommertsiialyq emes halyqaralyq uiym. Niý-Iork qalasyndaǵy shtab-páteri men Vashington jáne Bangkoktaǵy filialdary arqyly CPJ jýrnalisterge qatysty quqyqbuzýshylyqtardy – kisi óltirý, qamaý, tsenzýra siiaqty jaǵdailardy – turaqty túrde qadaǵalaidy, tergeýler júrgizedi, «Attacks on the Press» jáne «Dangerous Assignments» siiaqty esepter jariialaidy, 120-dan astam elde jýrnalisterge quqyqtyq, meditsinalyq kómek jáne jedel evakýatsiia usynady. Uiym qaiyrymdylyq qarajatymen qarjylandyrylady, jyl saiyn Halyqaralyq baspasóz bostandyǵy syilyǵyn tabystaidy jáne Afrika, Aziia, Eýropa men basqa da óńirler boiynsha aimaqtyq mamandardy úilestirip, qaýip-qaterge jedel áreket etedi.
