Kaspii teńiziniń jaǵalaýynda oryn alǵan jappai balyqtyń qyrylýy ekologiialyq apattyń belgisi bolýy múmkin. Bul týraly Aqtaýlyq táýelsiz ekolog, «ECOJER» qaýymdastyǵynyń óńirlik ekologiialyq keńesiniń tóraǵasy Ádilbek Qozybaq málimdedi, dep habarlaidy Dalanews.kz QazAqparatqa silteme jasap.
Ekologtyń aitýynsha, qazirgi tańda zerthanalyq saraptamalar tek teńizdiń jaǵalaýynan alynǵan synamalarmen shektelip otyr. Al bul jaǵdaidyń tolyq kórinisin ashýǵa jetkiliksiz.
«Balyqtyń jappai qyrylýy — teńizdiń lastanýynyń aiqyn belgisi. Lastaný kózin naqty anyqtaý úshin oqiǵa oryn alǵan aýmaqtyń ózinen zertteý júrgizilýi kerek. Áitpese, basqa aýmaqtardan alynǵan synamalar tolyqqandy nátije bermeidi», – dedi Qozybaq.
Ol sondai-aq Kaspiide jumys istep jatqan barlyq munai kompaniialaryn qatań baqylaýǵa alýdy usyndy.
«Mundai tekserýlerge mindetti túrde táýelsiz ekologtar tartylýy kerek. Tek sol kezde ǵana biz bolashaqta oryn alýy múmkin ekologiialyq apattardyń aldyn ala alamyz», – dep atap ótti ekolog.
Óz kezeginde «Qazaq Balyq» respýblikalyq balyq sharýashylyǵy jáne akvakýltýra qaýymdastyǵynyń Mańǵystaý oblystyq filialynyń direktory Daniiar Akimjanov bul ekologiialyq másele jańa emes ekenin aitty. Onyń sózinshe, Kaspiide sońǵy eki-úsh jyl ishinde usaq balyqtardyń ǵana emes, sý qustarynyń da qyrylýy jiilegen.
«Negizinen jas karakozdar qyrylyp jatyr. Olar kúzge deiin ósip, aýlanýǵa jaramdy deńgeige jetýi kerek edi. Qazir sý men topyraqtan synama alyp jatyrmyz deidi, biraq bul jetkiliksiz. Qatań ári naqty sharalar qabyldanýy kerek. Táýelsiz sarapshylar men zerthanalar tartylyp, keshendi jumys qolǵa alynýy qajet», – dedi Akimjanov.
Sondai-aq ol ekolog Qozybaqtyń tek jaǵalaýmen shektelip qalmai, teńizdiń basqa bólikterin de qamtý qajet degen pikirimen kelisti.
«Araldardy, Kaspiidiń soltústik jáne ońtústik bólikterin de zertteý qajet. Barlyq aimaq tekserilýi tiis», – dedi ol.
Eske sala keteiik, buǵan deiin Mańǵystaý oblysynda Kaspii teńiziniń jaǵalaýynda balyqtyń jappai qyrylýy tirkelgen bolatyn. Mamandar Fort-Shevchenko qalasy mańynan sý synamalaryn alyp, saraptama júrgizip jatyr. Zertteý nátijeleri keiinirek jariialanady dep josparlanýda.
