Kásiptiń kózin tapqan
Basynda balmuzdaq satýmen ainalysqan ol, keiinnen jiǵan-tergen qarjysyn jinastyryp, ony úlken kásip ashýǵa jumsaǵan. «Aǵaiyn tatý bolsa, at kóp» degendei, Koshali da isin ikemdei júrip, óziniń baýyrlaryn da kásipkerlikke beiimdeidi. Qazirgi tańda Niiaz, Fatali, Ramazan esimdi birge týǵan baýyrlarymen aýdandaǵy «Ramazan» naýbaihanasyn, «Nursultan» saýda úiin, «Arzý» meiramhanasyn, «Balýan Sholaq» sport keshenin, tehnikalyq qyzmet kórsetý ortalyǵyn, janar-jaǵarmai beketin, azyq-túlik pen qurylys zattary dúkenderin jáne saýda ǵimarattaryn ashyp, shýlyqtarǵa úzdiksiz qyzmet kórsetip keledi. Koshali Allasuly 2017 jyly taǵy bir kásipkerlik nysannyń qurylysyn bastaǵan bolatyn. Araǵa bir jyl salyp qurylysty tolyǵymen aiaqtap, ótken jyly kópshiliktiń qoshemetimen sol nysannyń ashylý saltanatyn ótkizdi. «Nurly jol» dep atalatyn ámbebap tehnikalyq qyzmet kórsetý ortalyǵy zamanaýi úlgide salynypty. Mundaǵy kelýshilerge dúken, dámhana jáne aqsha aiyrbastaý men kólik jýý, jóndeý jumysynyń san túri sapaly qyzmet kórsetip keledi.
Jalpy alǵanda Shý aýdany boiynsha 6 myńnan asa kásipker bar desek, olar qyryq myńǵa jýyq adamdy jumyspen qamtyp otyr eken. Al búginge deiin 50-den asa adamdy jumyspen qamtyp kelgen Koshali Gýseinov, endi taǵy 60 adamǵa turaqty jumys ornyn ashýda. Ortalyqtyń bir ereksheligi – onyń ataýy men jarnamalyq jazýlary tól álipbiimiz – latyn grafikasymen tańbalanǵandyǵynda.Taǵy bir aita keterligi, atalmysh ortalyq respýblikalyq mándegi joldyń boiynda ornalasypty. Bul degenimiz – kózdiń jaýyn alarlyqtai kórinisti tek aýdan halqy ǵana emes, ózge aimaqqa qatynaityn qonaqtar da kóretin bolady.Osy tusta, aýdannyń gúldenýine, turǵyndardyń áleýmettik jaǵdaiynyń artýyna aitarlyqtai úles qosyp júrgen Koshali Gýseinovke Shý aýdanynyń Qurmetti azamaty ataǵy da berilgenin aita ketken jón. Budan basqa da kóptegen Qurmet gramotalary men Alǵys hattarǵa ie bolǵan. Al eń úlken oljasy – Elbasy Nursultan Nazarbaevtyń qoly qoiylǵan «Birlik» altyn medalin keýdesine taqqany bolyp tur.
