Qazaqstanda keiingi jyldary sporttyń jai-kúii jii talqylanatyn taqyryptar qatarynda. Buǵan Ulttyq olimpiada komitetin biraz jyl eks-prezident Nazarbaevtyń kúieý balasy Timýr Qulybaevtyń basqarýy da sebep bolsa kerek. Májilis depýtaty Ermurat Bapi Qulybaevty "oiy - munai satyp, qaltasyn toltyrý, sportty qaitsin?!" dep ashyq synap tastady. Keiin komitette úlken aýys-túiis boldy, desek te quramda Eski Qazaqstannyń ókilderi qylań berip qaldy. Oǵan qosa keiingi kezde jalpy sport salasyndaǵy sybailas jemqorlyqqa qatysty birneshe daýly oqiǵa boldy, - dep habarlaidy Dalanews.kz.
Sybailas jemqorlyqqa qarsy qyzmet birneshe aidan beri sport salasyndaǵy sheneýnikter men olar basqaratyn qurylymdardyń qyzmetine tekseris júrgizip keledi. dw.com osy taqyrypta zertteý júrgizip kórgen. Derekterge súiensek, 2024 jyldyń basynan bastap elde biýdjet qarajatyn urlady degen kúdikpen bes adam ustalǵan. Onyń ishinde keibir sheneýnikter uzaq merzimge sottalyp ketken.
"Memleketten sýbsidiia alatyn keibir sport mektepteri men klýbtarynda osyǵan bailanysty shuǵyl jinalystar ótkizilgen. Al mekeme basshylary óz qaramaǵyndaǵylardan sybailas jemqorlyqqa qarsy qyzmetkerlermen sóilesý barysynda olarǵa qarsy kýálik bermeýin suraidy", - dep jazylǵan derekte.
Eń daýly oqiǵalardyń ishinde 117 myń eýroǵa jýyq urlady degen kúdikke ilingen Sportty damytý direktsiiasynyń basshysy Oralbai Jaqsymbetov, 102 myń eýrodan asa qarjy jymqyrǵany úshin 7 jylǵa bas bostandyǵynan aiyrylǵan Astananyń Olimpiadalyq sport túrlerin damytý direktsiiasynyń burynǵy basshysy Baǵdat Daniiarov ta bar.
Sonymen qatar, qazir Úrimshi qalasyndaǵy (QHR) bazarlardan Qazaqstan quramasynyń 2023 jylǵy Aziia oiyndarynda óner kórsetýi úshin sapasyz kiim satyp alý isine qatysty tergeý júrip jatyr.
"Qarjy monitoringi agenttiginiń aqparaty boiynsha sportshylarǵa arnalǵan jabdyqty satyp alý kezinde "oilastyrylǵan shemany" paidalaný nátijesinde Týrizm jáne sport ministrligi janyndaǵy sportty damytý direktsiiasynyń sheneýnikteri memleketke 778 myń eýrodan asa shyǵyn keltirdi", - dep keltirilgen derekte.
Ótken aida mádeniet jáne sport ministriniń orynbasary, premer-ministrdiń keńesshisi laýazymdaryn atqarǵan, onyń ústine eldiń eń ataqty fýtbol klýbtarynyń biri "Astana" direktorlar keńesiniń tóraǵasy bolǵan Erlan Qojaǵapanov ustaldy. Onyń naqty ne úshin aiyptalǵany áli belgisiz, is qupiia sanalady. Sybailas jemqorlyqqa qarsy is-qimyl agenttigi málimetinshe, Qojaǵaparov "aýyr sybailas jemqorlyq jasady" degen kúdikpen ustaldy.
Sybailas jemqorlyq qylmystary boiynsha sot protsesteri tek joǵary deńgeidegi sheneýnikterdi qamtyǵan joq: 12 naýryzda Shymkentte 12 myń eýro somasyna issapar qujattaryna qatysty alaiaqtyq jasady dep aiyptalǵan jergilikti sport mektepteriniń jattyqtyrýshylaryna úkim shyqty. Protsestiń qatysýshylary bir jyldan eki jylǵa deiin bas bostandyǵynan aiyryldy.
Basylym málimetinshe, mundai protsester jaqyn arada kóp bolýy da múmkin, óitkeni sheneýnikterdiń aila-amaldary týraly tanymal sportshylar da ashyq aita bastaǵan.
Solardyń biri UBO World Champion jáne WBC International boiynsha áielder boksynda jeńil salmaqtaǵy belbeýdiń iegeri Angelina Lýkas boldy. 17 naýryzda telejúrgizýshi Dinara Satjannyń suhbatynda ol Qazaqstan quramasyndaǵy keibir jaittar týraly aitty.
"Nelikten Aziia oiyndarynyń aldynda, Álem chempionattarynyń aldynda barlyǵy jinalyp, kalian ákelip, iship, shegedi? Biraq bul týraly eshqashan aitqan emespin", - dedi ol.
Sonymen qatar, Angelina Lýkas "etikalyq sebepter boiynsha" Qazaqstan quramasynan shyǵarylǵannan keiin kásibi boksqa aýysqan bolatyn. Ol qazaqstandyq sportshylardyń tabysy az ekenin de aitty, sonyń saldarynan olardy basqa elderdiń ókilderi satyp alýǵa tyrysyp jatyr.
Angelina Lýkastyń sózderin AQSh-ta turatyn taǵy bir sportshy Aida Satybaldinova rastady. Al jaýaptylar Lýkastyń synyna eshqandai reaktsiia jasaǵan joq.
Sport kommentatory Aleksandr Liahov tennis týrnirlerin, hokkei jáne fýtbol matchterin únemi jariialap otyrady, ol mundai jaittar birinshi ret emes ekenin aitty.
Onyń sózinshe, sport salasyndaǵy sheneýnikter tipti Toqaevtyń qoldaýymen balalarǵa tegin shyǵarmashylyq úiirmeler men sport sektsiialaryn ashýǵa baǵyttalǵan "ArtSport" baǵdarlamasyna da qol salǵan.
"Jaǵdaidy tek joǵarydan bastap ózgertýge bolady. Kásibi sportty biýdjetten qarjylandyrýdy toqtatý kerek. Biraq men tipti muny fýtbolda da kórmeimin", - dedi ol.
Tanymal sport jýrnalisi Leonid Iýrev te osyǵan uqsas pikirde.
"Qazaqstandaǵy sport - jyldar boiy úlken qarjyny esh baqylaýsyz soryp kele jatqan qara tesik. Eger memlekettiń sportty damytýǵa jumsaityn jalpy shyǵynyn alsaq, olar densaýlyq saqtaý men bilim berý shyǵyndarynan sál ǵana az", - deidi ol.
Onyń aitýynsha, sybailas jemqorlyqqa qarsy qyzmet byltyr jeltoqsanda sporttaǵy sybailas jemqorlyq mámileleri týraly aqparat jinaý bastalǵanyn jariialap, sportshylardy osy protseske belsendi qatysýǵa shaqyrdy.
"Meniń oiymsha, bul tolyq oilastyrylmaǵan. Qazaqstanda sport burynǵydai ári qarjylyq jaǵynan ashyq emes emes kúide qala beredi. Sport federatsiialary esep bermeidi. Olar qoǵamdyq uiymdar sanalatyndyqtan, olardyń qyzmetin memleketke tekserý qiynǵa soǵady", - dedi Iýrev.
